OÉ-CUSSE, 09 Agostu 2024 (TATOLI) – Serbisu Saúde Rejiaun Administrativa Espesiál Oé-Cusse Ambeno (RAEOA) rejista, iha semestre dahuluk 2024, pasiente ho moras tuberkuloze (TBC) hamutuk 102 no na’in-hitu lakon vida.
“Moras tuberkuloze ne’ebé agora ita rejista iha Servisu Saúde Rejionál Oé-Cusse ho totál 102, husi númeru ne’e na’in-hitu mate maske hetan tratamentu, maibé lakonsege salva, tanba grave ona”, Diretór Servisu Saúde RAEOA, António Firdaus Neno, informa ohin.
Notísia relevante: Edifísiu ne’ebé utiliza ba tratamentu pasiente TBC iha Nípani abandonadu
Nia informa katak husi pasiente 102 ne’e, iha na’in-36 mak kura ona, 59 mak kompleta ona sira-nia tratamentu no hitu mate.
Nia esplika impaktu husi moras TBC ne’e kauza husi kutun ho naran mikrobaktéria tuberkuloze ne’ebé hada’et liuhusi anin, bainhira ema ida hetan ona kutun ne’e, serteza katak bele da’et liuhusi me’ar ka fani ba fali ema seluk.
“Meiu prevensaun bainhira ita hetan me’ar ka fani durante semana tolu tenke hakbesik-aan ona bá iha instalasaun saúde, nune’e bele prevene husi moras TBC”, nia fó hanoin.
Notísia relevante: Promosaun moras hada’et, RAEOA-NTT konkorda hahú uluk iha Naktuka-Oépoli
Atu prevene moras ne’e, daudaun tékniku sira esforsa hodi tun bá baze halo screening masál, nune’e bele halo detesaun ba kazu hodi haforsa iha prevensaun no halo mós sensibilizasaun tuir matadalan Ministériu Saúde ne’ebé aplika ba iha instuisaun saúde iha munisipíu, inklui RAEOA.
“Primeiru, persiza interven mak hala’o screening masál ba família pasiente no deteta kazu sira-neʼebé hatudu sintoma moras TBC, bele hetan amostra ba sira-nia kabeen-tasak, halo teste iha laboratóriu hodi hetan nia konfirmasaun”, esplika.
Nia salienta, ba daruak, halo screening masál ba komunidade, nuneʼe Servisu Saúde Rejionál identifika kazu TBC neʼebé konfirmadu iha fatin ketak-ketak, nune’e halo screening ne’e tanba konsidera fatin ne’e tama ba área risku ba moras.
Datoluk, Servisu Saúde l identifika grupu risku ba programa TBC nian no sei halo screening ba pasiente foun neʼebé pozitivu TBC, tanba liuhusi screening ba pasiente sira bele identifika katak kazu ne’e da’et ona iha família uma-laran ka seidauk no dahaat, Servisu Saúde Rejionál hala’o screening ba labarik menór ne’ebé afeta má-nutrisaun.
Notísia relevante: Saúde Oé-Cusse rejista kazu TBC 50 iha trimestre daruak
Jornalista: Abílio Elo Nini
Editóra: Maria Auxiliadora
