iklan

HEADLINE, OEKUSI

Edifísiu ne’ebé utiliza ba tratamentu pasiente TBC iha Nípani abandonadu

Edifísiu ne’ebé utiliza ba tratamentu pasiente TBC iha Nípani abandonadu

Edifísiu ne’ebé utiliza ba klínika TBC iha Nípani abandonadu. Imajen Tatoli/ Abílio Elo Nini

OÉ-CUSSE, 08 Agostu 2024 (TATOLI) – Edifísiu ne’ebé konstrui, iha 2021, husi autoridade anteriór Rejiaun Administrativa Espesiál Oé-Cusse Ambeno hodi utiliza ba klínika moras tuberkuloze (TBC), iha aldeia Sakato, suku Nípani, sub-rejiaun Pante Makasar, daudaun ne’e abandonadu.

Xefe suku Nípani, Pedro Ceo Eko, lembra katak autoridade RAEOA konstrui edifísiu ne’e ho valór osan $154.551,69, ne’ebé kompostu  husi rezidénsia ba pesoál saúde, sala izolamentu sia ba pasiente TBC, sala ba atendimentu, laboratóriu no sala ba farmásia, ne’ebé kompleta ho muru protesaun.

Xefe suku Nípani, Pedro Ceo Eko. Imajen Tatoli/ Abílio Elo Nini

“Agora, uma ne’e mamuk hela. Tan ne’e, ha’u rekomenda ba autoridade, liuliu ba asuntu saúde katak edifísiu harii ona iha ami-nia suku no iha tempu covid-19 sai fatin emerjénsia. Nune’e, bele uza ba funsionamentu seluk, tanba uma ne’e agora abandona hela”, Pedro Ceo Eko dehan iha fronteira Sakato, ohin.

Notísia relevante: RAEOA konstrui klínika TBC separa atendimentu ba pasiente

Nia hateten komunidade iha suku Nípani koopera hodi entrega fatin ne’e hodi konstrui edifísiu ne’e atu utiliza ba atendimentu saúde. “Ha’u espera katak autoridade atuál bele uza fatin ne’e ba nesesidade saúde de’it, tanba ami iha ona postu saúde, nune’e bele utiliza ba sentru atendimentu moras seluk, tanba ne’e gasta osan Estadu”, nia suejere.

Hatán ba rekomendasaun ne’e, Sekretária Rejionál ba Asuntu Saúde, Luís de Jesus Neno, rekoñese katak edifísiu ne’e abandona hela, tanba antes ne’e uza ba halo tratamentu moras tuberkuloze, maibé agora iha ona sala iha ospitál referénsia Oé-Cusse.

Notísia relevante: Prezidente Autoridade RAEOA inaugura klínika moras TBC

“Tuir planu, atu uza ba sentru saúde mentál nian, tanba kazu saúde mentál iha Oé-Cusse ita rejista ona 102. Tanba ne’e mak ita sei uza fatin ne’e, duké sira bá halo tratamentu iha Laklubar-Manatuto, di’akliu ita kria iha ne’e depois mak ita husu apoia espesialista husi nasionál mai fó atendimnetu”, nia adianta.

Nia salienta katak daudaun ema ho moras mentál balun hala’o ona tratamentu iha sentru saúde mentál Laklubar no seluk kontinua la’o livre iha sosiedade, tanba to’o oras ne’e, Oé-Cusse seidauk iha fatin própriu atu akumula ema hodi hetan tratamentu dignu.

Notísia relevante: RAEOA rejista pasiente 34 infetadu TBC

Lembra katak klínika izolamentu ba TBC konstrui husi empreza Tafen Kuan Unipesoal, Lda, ho valór kontratu $154.551,69, ne’ebé nia verba mai husi Orsamentu Jerál Estadu 2021.

Jornalista: Abílio Elo Nini

Editora: Maria Auxiliadora

iklan
iklan

Leave a Reply

iklan
error: Content is protected !!