OÉ-CUSSE 09 agostu 2023 (TATOLI – Autoridade Rejiaun Administrativa Espesiál Oé-Cusse Ambeno (RAEOA) liuhosi Sekretáriu Rejionál ba Asuntu Saúde, hamutuk ho autoridade sira iha Provínsia Nusa Tenggara Timur (NTT) liuliu distritu Timur Tengah Utara (TTU) no distritu Kupang konkorda hodi promosaun integrada ba komunidade sira iha liña fronteira, sei hahú uluk iha fronteira Naktuka suku Bene-Ufe sub-rejiaun Nítibe ho Oépoli distritu Kupang.
Nótísia relevante: RAEOA koordena TTU-Kupang halo promosaun integrada ba moras hada’et
Diretora Servisu Saúde Oé-Cusse, Lolita dos Santos, informa, promosaun integrada ne’e foku ba moras hada’et tolu, HIV-SIDA, malária no Tuberkuloze (TBC).
Objetivu hosi promosaun integrada ne’e, atu hasa’e koñesimentu komunidade sira liuliu liña fronteira rai maran entre Timor-Leste ho Indonézia hodi prevene-aan.
“Rezultadu ne’ebé maka hosi ekipa servisu saúde rejionál no hosi Ministériu Saúde, iha loron 30 jullu ne’e ami ba koordena ho Dinas Kesehatan Kupang no TTU, rezultadu pozitivu, katak parte rua konkorda atu halo promosaun ba moras hada’et sira iha tolu ba komunidade sira iha liña fronteira,” Lolita dos Santos ba jornalista sira iha Oé-Cusse, kuarta ne’e.
Tan ne’e, ohin ne’e servisu saúde rejionál hahú enkontru preparasaun, hamutuk ho xefe sentru saúde sira, ho departamentu hotu atu estabelese komisaun, no diskute estratéjia ba implementasauna atividade sira-ne’e.
Nótísia relevante: Aniversáriu sidade Kefamenanu, nu’udar opurtunidade hametin kooperasaun entre RAEOA-TTU
Lolita dos Santos hateten, atividade ne’ebé mak sei halo iha fronteira sira-ne’e, foka liu ba promosaun saúde liuliu ba moras hada’et tolu, nune’e komunidade sira iha liña fronteira entre Timor-Leste ho Repúblika Indonézia, bele iha koñesimentu atu prevene-aan.
“Moras hada’et tolu ne’e maka HIV-SIDA, malária no mós TBC, komunidade rua tenke prevene-aan liu-liu iha fronteira,” nia afirma.
Tuir nia, kaléndariu ba implementasaun atividade promosaun ne’e prioridade ba fronteira haat iha sub-rejiaun Pante Makasar, Oésilo, Nítibe no Pássabe, hanesan faze dahuluk ba períodu tinan 2023 nian.
“Maibé iha loron 29 agostu, sei hahú uluk hosi fronteira Naktuka ho Oépoli, sub-rejiaun Nítibe, tuir mai iha loron 05 setembru kontinua ba iha fronteira Wini-Sakato, Pante Makasar, iha loron 11 setembru kontinua fali iha sub-rejiaun Oésilo, iha fronteira Napan ho Bobometo ikusliu iha fronteira Pássabe iha fronteira Bijae-Sunan ho Abani,” nia informa.
Nia informa, durante atividade sei hetan partisipasaun másima hosi autoridade komunitáriu sira, xefe suku, xefe aldeia jestór no xefe bairru sira hamutuk komunidade entre Timor-Leste ho Indonézia.
Aliende ne’e mós sei partisipa hosi autoridade RAEOA lidera Prezidente Autoridade no servisu sentrál hosi Ministériu Saúde.
“Iha sorumutu ne’e parte rua, responsável ba moras hada’e tolu ne’e mak sei aprezenta atinjimentu, entre ita ho sira, idak-idak sei aprezenta depois iha sesaun husu no hatán,” nia katak.
Notísia relevante: Governadór NTT hasoru PM Taur diskute atu harii zona franka entre RAEOA no Wini
Jornalista: Abílio Elo Nini
Editór: Evaristo Soares Martins
