iklan

HEADLINE, MUNISÍPIU, OÉ-CUSSE (RAEOA), SAÚDE

Saúde Oé-Cusse rejista kazu TBC 50 iha trimestre daruak

Saúde Oé-Cusse rejista kazu TBC 50 iha trimestre daruak

Diretora Servisu Saúde Oé-Cusse, Lolita dos Santos. Imajen Tatoli/Abílio Elo Nini.

OÉ-CUSSE, 10 agostu 2023 (TATOLI – Diretora Servisu Saúde Rejiaun Administrativa Espesiál Oé-Cusse Ambeno (RAEOA), Lolita dos Santos, informa, iha trimestre primeiru to’o trimestre daruak 2023, servisu saúde Oé-Cusse, rejista kazu ba pasiénte moras Tuberkuloze (TBC) hamutuk na’in-50, enkuantu ba moras malária laiha.

“Kazu TBC iha trimestre peimeiru no segunda  iha na’in-50, ita agora iha komitmentu atu hapara moras ne’e iha 2025, entaun atividade sira-ne’ebé ita halo mak, screening masál ba iha suku sira-ne’ebé maka ita identifika suspeitu TBC barak, maibé ba kazu malária to’o ohin, ita laiha, maibé prevensaun liuhosi atividade rega susuk fahe muskateiru, ne’e ita nafatin halo,” Diretora Servisu Saúde Oé-Cusse, Lolita dos Santos, ko’alia iha Oé-Cusse, kinta ne’e.

Notísia relevante: MS avalia progresu servisu no prepara estratéjia kombate kazu TBC

Tuir nia, esforsa ne’ebé servisu saúde Oé-Cusse halo, atu prevene moras ne’e, maka fasilita formasaun ba profisionál saúde sira, halo enkontru ho autoridade lokál sira, hosi jestór, xefe suku, xefe aldeia to’o xefe bairru sira, no mós faslita formasaun ba voluntáriu saúde sira iha sentru saúde no postu saúde sira.

“To’o etapa ikus maka agora screening masál ba komunidade sira, ne’e ita halo, tanba ita hetan apoia fundu orsamentu hosi Fundu Global,” nia katak.

Diretora ne’e esplika, pasiente na’in-50 ne’e, sei kontinua hala’o tratamentu no hetan mós supervizaun hosi profisionál saúde sira.

Tuir nia, tratamentu ba pasiénte TBC ne’e, baibain to’o fulan neen (6), balu to’o fulan ualu (8), depende hosi moras ne’e, maib’e tratamentu ne’e baibain atualiza  liuhosi monitorizasaun beibeik no halo mós vizita direita ba pasiente nia rezidénsia .

Notísia relevante: Kombate moras HIV-Malária-TBC, Fundu Global sei apoiu milliaun $15 ba Timor-Leste  

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!