DILI, 21 Novembru 2025 (TATOLI) — Telkomcel selebra aniversáriu ba dala 13 hodi hala’o Telkomcel Connect, festivál loron tomak ho tema “Sunrise to Sunset,” ho atividade sira hanesan konsertu desportu, saúde, divertimentu, kulinária, no múzika.
Selebrasaun ne’e sai nu’udar apresiasaun Telkomcel nian ba povu Timor-Leste ba sira-nia apoiu durante dékada ida resin.
Eventu ne’e sei hala’o husi dadeer to’o kalan iha loron 22 fulan-novembru tinan 2025, hodi simboliza kompromisu Telkomcel nian hodi kontinua fornese konektividade ne’ebé la’ós de’it liga rede sira maibé mós liga povu Timor-Leste nia fuan.
Informasaun sira ne’e fó sai diretamente hosi Benedictus Ardiyanto Priyo, CEO Telkomcel, durante konferénsia imprensa ho jornalista sira iha Otél Palm Spring, Sesta ne’e.
Eventu ne’e sei hahú ho Walk to Connect, paseiu divertidu husi Timor Plaza to’o Porto Dili. Partisipante sira sei partisipa atividade interativu oioin iha dalan, inklui sesaun Zumba ne’ebé enerjétiku.
Hanesan parte ida husi kampaña saúde nian, Telkomcel mós sei hala’o Talkshow Estilu Moris Saudavel ne’ebé konta ho peritu saúde lokál Dra. Isabel de Jesus Amaral no Bambang Hermanto, Fundadór Hygio Technology. Sira na’in rua sei diskute kona-ba nutrisaun, kondisaun fíziku, no saúde mentál, hodi enkoraja família sira atu adota estilu moris saudavel iha sira nia moris loroloron.
Iha eventu hanesan, Telkomcel sei introdús Familink, servisu dahuluk hosi banda larga uma móvel empreza nian. Servisu ida ne’e dezeña atu asegura kada família iha Timor-Leste ligadu nafatin iha uma ho ligasaun ne’ebé lais no konfiável, suporta atividade aprendizajen, servisu, no divertimentu.
“Ho Familink, ami la’ós de’it fornese konetividade ne’ebé lalais liu no konfiável liu, maibé mós fó kbiit ba família sira atu buras iha edukasaun, serbisu, no divertimentu hosi konfortu sira nia uma. Ida-ne’e maka marku importante ida iha ami nia viajen atu harii nasaun ida ne’ebé ligadu liu,” dehan Benedictus Ardiyanto Priyo, CEO Telkomcel nian.
Atividade iha parte meiudia sei nakonu ho Family Time, Festivál Kulinária rekreasionál ho partisipasaun husi Empreza Mikro, Ki’ik no Médiu sira. Vizitante sira bele koko hahán oioin no aprende servisu pagamentu uza TPay, solusaun dijitál ida ne’ebé mós promove iha eventu ne’e.
Partisipasaun Empreza Mikro, Ki’ik no Médiu sira iha festival ne’e hatudu Telkomcel nia apoiu ba ekonomia lokál no talentu kreativu Timor-Leste nian.
Iha parte lorokraik ba kalan, Telkomcel aprezenta Creative Entertainment ho aprezentasaun muzikál husi artista populár sira hanesan Mario G. Klau, Fresly Nikijulu, no joven talentu Timor-Leste Crimson, Marvi, Alcatraz no seluk tan inklui kompetisaun dansa finál sira no divertimentu sira seluk.
CEO Telkomcel nian subliña katak Telkomcel Connect sei sai nu’udar eventu anuál ida, hodi hatudu kompromisu empreza nian hodi hametin nia relasaun ho komunidade.
“Durante tinan 13, ami sente orgullu hodi serbí no buras iha komunidade ida-ne’e nia sorin. Telkomcel Connect hanesan ami nia dalan hodi hato’o obrigado ba povu Timor-Leste. Selebrasaun ida-ne’e dedika ba espíritu hamutuk ne’ebé define ami,” dehan Benedictus.
Nia mós hato’o nia apresiasaun ba governu, patrosinadór sira, parseiru sira, no parseiru mídia sira ba sira-nia apoiu ne’ebé halo eventu boot ida-ne’e sai susesu.
Telkomcel nu’udar fornesedór servisu telekomunikasaun prinsipál iha Timor-Leste, hala’o operasaun dezde 2012 nu’udar parte ida husi Telin (Telkom Indonesia Internasionál). Ho foku ba inovasaun, inkluzividade, no valór família nian, Telkomcel kontinua hala’o knaar vitál hodi liga komunidade sira no dudu transformasaun dijitál iha Timor-Leste.
Jornalista : Cidalia Fátima
Editora : Armandina Moniz
