GINÉ-BISAU, 21 Novembru 2025 (TATOLI)-Ekipa Misaun Observasaun Eleitorál (MOE) g7+, kinta ne’e, halo observasaun ba kampaña ikus husi kandidatu sira ne’ebé atu kompete ba iha eleisaun prezidénsial iha Giné-Bisau ne’ebé sei realiza iha loron 23 Novembru tinan ne’e.
Xefe Operasionál g7+, Felix Piedade, hateten observasaun ne’ebé ekipa halo ne’e iha fatin ne’ebé diferente, kandidatu Umaro Sissoco Embaló, atuál Prezidente Repúblika Giné-Bisau husi Partidu Plataforma Republikana hala’o atividade kampaña ikus iha rejiaun Biombu no kandidatu Indepedente, Fernando Dias da Costa, iha Bissau.
Xefe Operasionál ne’e, dehan husi kampaña iha Biombu ne’e ekipa MOE observa situasaun ein-jerál la’o kalma, pás tanba apoiante sira ne’ebé mak marka prezensa iha ne’ebá haree sira hotu kontente tuir kampaña ne’e.
“Husi ita-nia observasaun ne’e, haree situasaun hotu la’o di’ak, ita mós haree katak, iha kampaña apoiante sira mai ne’e, hahú husi klosan, ferik {no} katuas, labarik sira, inklui ita hetan mós ema defisiénsia fíziku balun, marka prezensa iha kampaña ne’e, laiha diskriminasaun”, Xefe Operasionál g7+,Felix Piedade, informa ba Tatoli iha Otel Ceiba, hafoin halo observasaun.
Hafoin halo obsevasaun iha Biombu ekipa kontinua ba halo observasaun ba kandidatu Indepedente, Fernando Dias da Costa ne’ebé hala’o kampaña iha rejiaun Bissau.
“Bainhira ekipa to’o ne’ebá, atividade kampaña hahú ona, no ema barak tebes. Maibé, situasaun ne’ebé ita nota katak, maski ema barak, maibé ema ba hanesan divertimentu, balun aproveita faan hahán la halo asaun ruma. Hanoin ida-ne’e ambiente ida-ne’ebe hatudu katak, komunidade iha maturidade polítika”, nia dehan.
Husi atividade kampaña rua ne’e, nia salienta, povu hatudu tebes sira-nia maturidade, tanba durante ekipa nia viajen halo observasaun ba fatin kampaña haree katak, apoiante husi kandidatu rua ne’e sees malu iha estrada mós la book malu. “Ida-ne’e, hatudu maturidade husi povu katak, sira apoiu kandidatu diferente, maibé respeitu malu”.
Durante observasaun situasaun hotu la’o di’ak tanba hetan seguransa másima husi autoridade militár no polísia.
Xefe Operasionál g7+, esplika ohin loron kampaña ikus ba kandidatu Prezidente husi partidu hotu ne’ebé atu kompete iha eleisaun prezidensiál.
“Maibé, balun ne’ebé partidu ki’ik, tuir informasaun sira la halo kampaña. Maibé halo de’it mak door to door (husi uma ba uma), entaun ekipa foka halo observasaun ba partidu boot sira. Maibé ein-prinsípiu kandidatu hotu, ohin loron ikus ba halo kampaña”, hateten.
Jornalista : Arminda Fonseca
Editór: Rafael Ximenes de A. Belo
