DILI, 22 Novembru 2025 (TATOLI) – Governu liuhusi reuniaun estraordinária Konsellu Ministru (KM), sábadu ne’e, aprova projetu rezolusaun Governu, kona-ba konkursu mineiru públiku.
Projetu rezolusaun ne’e aprezenta husi Ministru Petróleu no Rekursu Minerál (MPRM), Francisco da Costa Monteiro, ne’ebé aprova termu referénsia ba konkursu mineiru públiku ba konsesaun lisensa prospesaun no peskiza ba minerál metáliku, gemas, minerál industriál, minerál radioativu no mineiru no rai raru (ne’ebé ladún barak).
“Termu referénsia sira ne’ebé agora aprova, estabelese enkuadramentu nesesáriu, hodi hala’o konkursu públiku iha setór rekursu minerál. Tuir Kódigu Mineiru nian, garante regra ne’ebé klaru no transparente no aliña ho prátika internasionál sira ne’ebé di’ak-liu”, refere nota Governu ne’ebé Ajénsia Tatoli asesu, ohin.
Hafoin loke área sira ne’ebé destina ba atividade mineiru, ne’ebé deside hosi Governu iha fulan-Marsu tinan-2023, desizaun ida-ne’e atu promove oportunidade foun kona-ba investimentu no kria kondisaun ba dezenvolvimentu sustentavel iha setór ne’e.
Konkursu públiku ne’e tenke lansa iha semana ikus fulan-Novembru nian. Avaliasaun ba proposta sira sei hala’o hosi fulan-Juñu to’o Jullu tinan-2026, ho anúnsiu rezultadu sira ne’ebé prevee ba fulan-Jullu no emisaun ba lisensa sira ne’ebé marka ona ba fulan-Agostu tinan-2026.
Jornalista: Nelson de Sousa
Editór: Rafael Ximenes de A. Belo
