GINÉ-BISAU, 23 NOVEMBRU 2025 (TATOLI) –Giné-Bisau, país membru diretu plenu organizasaun luzófona – CPLP, domingu ne’e, realiza eleisaun Prezidensiál no Parlamentár (Lejislativa) hodi hili sira-nia líder foun ba mandatu Prezidensiál tinan-lima no Lejislativa tinan-haat.
Atividade sufájiu iha Giné-Bisau ne’e, observa mós husi Organizasaun g7+ ne’ebé lideradu husi Xefe Misaun Observasaun Eleitorál, Christina Joanna Mitini akompaña hosi Diretór Operasionál g7+ Felix Piedade.
Diretór Operasionál g7+, Felix Piedade hateten, eleisaun iha Giné-Bisau la’o ho demokrátiku tebes, no bazeia ba norma neʼebé iha tuir observasaun la iha irregularidade no Sirkulu Eleitorál loke ho pontualidade, hahú loke tuku hitu dadeer, sidadaun sira entuaziasmu partisipa hodi hili líder ne’ebé sira fiar.
“Ohin loron ekipa g7+ halo observasaun ba abertura eleisaun jerál ba Prezidensiál no Lejilativa. Observasaun ne’ebé ita halo ba Sirkulu Eleitorál haree eleisaun hahú loke ho pontuál tuku 07h00 dadersaan, ne’ebé hetan mós marka prezensa husi observadór internasionál sira seluk”, Felix Piedade ba Tatoli iha Rejiaun Bissau, ohin.
Diretór Operasionál ne’e esplika, iha eleisaun ekipa misaun nota katak la’o ho di’ak, no demokrátiku tebes no prosesu eleisaun ne’e nia lala’ok kuaze hanesan ho nasaun sira seluk.
Ezekutivu ne’e akresenta, iha eleisaun ne’e buat ne’ebé ekipa Misaun Observasaun nota katak bainhira halo abertura, ofisál meza rasik mak halo uluk votasaun, hafoin ba ofisiál partidu polítiku sira ne’ebé marka prezensa iha atividade sufrájiu ne’e.
“Diferente ne’ebé ita nota iha eleisaun ne’e mak kada Meza Asembleia Votu (MAV) iha ofisiál na’in-tolu de’it kompostu Prezidente Meza, Sekretariu Meza no Eskrutinadór. Antes fó oportunidade ba eleitór sira vota, ekipa meza loke uluk envolve ne’ebé iha loron rua liubá Militár no Polísia sira vota antesipada ne’e sira loke foti buletin votu ba urna laran”, Felix haktuir.
Tuir nia, ekipa Misaun Observasaun Eleitorál g7+ halo observasaun hahú husi abertura eleisaun, prosesu votasaun no enserramentu, hodi asegura katak kobre prosesu ne’e hotu nune’e bele hatene lala’ok eleisaun ne’e rasik.
Diretór Operasionál, Felix Piedade esplika, eleisaun Prezidensiál no Lejislativa tinan ne’e realiza iha rejiaun sia, mak hanesan Biombu, Oio, Cacheu,Tombali, Bafata, Gabu, Qinara, Bolama no Setór Autónomu Bissau.
Maibé, ohin ekipa Misaun Observasaun Eleitorál g7+ fahe ba ekipa tolu halo observasaun ba fatin tolu mak hanesan ba Bissau lidera hosi Xefe Misaun Observasaun Eleitorál g7+ Christina Joanna Mitini akompaña Diretór Operasionál g7+ Felix Piedade, ba Oio observa hosi Sekretáriu Jerál Komisaun Nasionál Eleisaun Repúblika Demokrátika Saun Tomé no Prínsipé, Melvim Nascimento Castro akompaña husi Asistente Pesoál g7+ Vitor Liu Gonçalves.
Ekipa ida na Biombu ne’ebé observa hosi Tékniku Protokolu no Parseiru g7+, Elísio Monteiro akompaña Diretór-Jerál Sekretariadu Tékniku Administrasaun Eleitorál (STAE), Elviro Fernandes.
Entretantu, eleisaun iha Giné-Bisau tuir observasaun Tatoli iha terrenu nota katak antes tuku hitu ekipa meza loke uluk urna ne’ebé prepara tiha hatudu ba eleitór sira hafoin kesi metin fali fó oportunidade ba eleitór sira vota.
Tuir dadus ne’ebé Tatoli asesu husi rejiaun sia ne’e iha Sirkulu Eleitorál hamutuk 29, totál Meza Asembleia Votu 3.728 no dadus eleitór ne’ebé rejistadu partisipa iha eleisaun ne’e hamutuk 966.159.
Tuir observasaun Ajénsia Tatoli iha terrenu nota katak eleisaun jerál ne’e hala’o iha fatin públiku maioria Sirkulu Eleitorál hala’o iha estrada-ibun. Bainhira eleitór sira foti buletin votu meza prepra ona urna rua ba Prezidensiál no Lejilativa nune’e eleitór ba vota iha kabina votu hafoin lori buletin ba tau urna ne’ebé prepara ona.
Jornalista : Arminda Fonseca
Editór : Rafael Ximenes de A. Belo
