DILI, 24 Novembru 2025 (TATOLI)—Sekretáriu Estadu Asuntu Toponímia Organizasaun Urbana (SEATOU), Germano Santa Brites, apela ba komunidade bainhira arrenda rai ba xineza presiza halo konsultasaun ba parte Terra no Propriedade.
“Komunidade atu halo buat ruma karik, tenke bá konsulta ho Terra no Propriedade. Se ita fó bá xineza okupa hotu, ita-nia vendedór ki’ikoan sira ita dudu hotu bá merkadu ne’ebá, sena malu mate. Ita buka haka’as aan, ita labele rai sira-ne’e ita arrenda tiha hotu ba xineza ita hetan osan selu uitoan ba Estadu ne’e ladi’ak,” Sekretáriu Estadu Germano dehan ba jornalista sira iha Tasi-Tolu, Segunda ne’e.
Tanba ne’e, nia informa, SEATOU mai hapara kontrusaun uma ne’ebé mak harii iha valeta leten iha área Aimutin, tanba antes ne’e Governu bandu ona labele halo uma iha valeta leten.
“SEATOU sobu uma ida-ne’ebé harii iha valeta leten parte Aimutin (eis merkadu nian). Tanba maluk balun arrenda hela ba Estadu, depoiz arrenda tutan ba xineza harii kedas iha valeta, kontrusaun ne’ebé maka Governu atu hadi’a. Tanbá ne’e, loron haat ba kotuk ita mai fó avizu nia na’in sobu rasik, más lakohi koopera pasiénsia ha’u tenke mai sobu,” Germano Santa Brites haktuir.
Sekretáriu Estadu ne’e tenik nia sobu hodi fó biban ba mákina sira-ne’e bele tama bá valeta laran.
“Ita sobu mákina hodibele tama ba valeta hodi normaliza tiha valeta laran ne’e, nune’e bee tun husi Canossa-Manleu nian mai ne’e normál hodi bá liu tasi. Governu laiha intensaun atu bandu, maibé fatin sira-ne’ebé mak dehan labele ne’e, labele duni,” nia konklui.
Jornalista: Osória Marques
Editór: Xisto Freitas da Piedade
