DILI, 24 Novembru 2025 (TATOLI)–Forsa Tarefa Konjunta kompostu husi Polísia Nasionál Timor-Leste (PNTL) no Komandu FALINTIL-Forsa Defesa Timor-Leste (F-FDTL), Segunda ne’e, lansa ona Operasaun Konjunta hodi tama sai bairu hodi asegura Seguransa iha ámbitu Komemorasaun tinan-50 Loron Proklamasaun Independénsia Unilaterál Repúblika Demokratika Timor Leste (RDTL) iha loron 28 Novembru 1975.
Forsa Tarefa sira daudaun ne’e halo hela preparasaun maka’as atu fó seguransa ba loron 28 Novembru ne’ebé sei akontese iha loron hirak tuir mai.
“Husu ba maluk sira hotu atu akompaña, atu kontribui, atubele relata kualker informasaun sira ne’ebé maluk sira hetan iha bairru idaidak ba PNTL ho nia parseiru no aliadu sira bele responde tuir nesesidade sira ne’ebe ita iha,” Portavós Komandu PNTL, Superintendente Polísia João Belo dos Reis hateten ba Jornalista sira iha ninia knaar fatin, iha Komandu Jerál PNTL, Kaikoli.
Notísia relevante : Ekipa konjunta alerta labele utiliza viatura Estadu iha loron finadu
Komandu PNTL no F-FDTL daudaun ne’e hasai ona diretiva operasionál, dahuluk mak sei halo patrullamentu hodi halo movimentu iha área hotu-hotu, halo kontrolu tránzitu no prevene asidente sira iha estrada públika sira.
“Diretiva operasionál ne’e mantein komunikasaun Direita ho Komandu Operasionál Distritál nomós regionál sira, prontu responde rápida insidente sira ne’ebé maka konsidera emerjénsia, halo kooordenasaun ho parte interligadu hodi ita halo prevensaun ne’ebé maka di’ak liu tan,” nia hato’o.
Portavós husu mós ba komunidade iha territóriu Timor-Leste tomak katak, presiza kontribui pás trankuilidade tanba pás no trankuilidade ne’e responsabilidade sidadaun hotu nian.
“Ida-ne’e responsabildade koletivu atu garante ita-nia nasaun seguru, hakmatek no hatudu ita-nia nasaun ne’ebé maka forte no di’ak ba mundu internasionál,” nia fó-hanoin.
Iha oportunidade ne’e Komandante hato’o katak eleinde operasaun ne’ebé mak ekipa konjunta Forsa Tarefa PNTL ne’e iha tan ekipa ida seluk ne’ebe iha kompozisaun ne’e mai husi Ministeriu interligadu ne’ebé lidera husi Alfándega (Ministériu Finansa) halo operasaun tama sai bairru, estrada públiku sira iha Fronteira Terrestre, Marrítima iha Kosteria sira atu kontrola movimentu maluk sira ne’ebé importa sasán ne’ebé ilegál mai Timor-Leste.
“Ami sei la fó dalan ba kualkér importasaun ne’ebé tama mai ilegál iha ita-nia nasaun laran, karik iha loja ruma, iha kios ruma ou ema ruma fa’an sira ne’e iha ita-nia rai laran, ami sei halo atuasaun,” nia informa.
Ekipa ne’e sei halo movimentu iha fatin hotu-hotu ne’ebé konsidera risku no iha posibilidade movimentu sasán sira ne’ebé ilegál.
Jornalista : Natalino Costa
Editora : Julia Chatarina
