DILI, 30 Outubru 2025 (TATOLI)-Ekipa konjunta husi Komisaun Funsaun Públika (KFP), Diresaun-Jerál Patrimóniu Estadu, Komisaun Anti-Korrupsaun (KAK), apela ba servidór Estadu atu labele utiliza veíkulu Estadu ba asuntu privadu iha loron finadu.
Komisáriu Funsaun Públika, Fausto Freitas da Silva ‘Liurai Tasi’, fó hanoin ida-ne’e tanba funsionáriu públiku sira simu ona subsídiu transporte nian.
Nia husu entidade hotu atu halo kontrolu sosiál bainhira hetan funsionáriu utiliza viatura Estadu bele hasai fotografia no xapa matríkula hodi hato’o keixa ba Komisaun atu foti medida.
“Servidór Estadu iha integridade ne’ebé di’ak no tenke kumpre regra hotu ho vigór”, nia hato’o liuhusi konferénsia imprensa iha edifísiu KFP, Matadouru, ohin.
Komisaun sei foti medida bainhira servidór sira la kumpre regra ne’ebé iha. “Sansaun halo irregularidade bele hetan suspensaun fulan neen no to’o la halo atividade tinan ida, kontinua prátika mak demite”, afirma.
Iha fatin hanesan, Diretora-Jerál Patrimóniu Estadu, Ministériu Finansa, Timótia Marques, esplika katak kestaun referida hatuur ona iha Dekretu-Lei númeru 80/2022, Regulamentu Veíkulu Estadu, Dekretu-Lei númeru 6/2003 sobre Kódigu Estrada.
No sikulár Governu atu reforsa kona-ba utilizasaun patrimóniu Estadu, liuliu viatura nian ne’ebé iha regra utilizasaun define ona katak uza ba finalidade profisionál no la autoriza uza ba asuntu privadu.
Hodi dehan dekretu-lei fó dalan atu kria ekipa konjunta ne’ebé durante ne’e kontinua halo monitorizasaun ba kestaun ne’e. “Ikus-ikus ne’e ekipa observa iha ministériu sira ladún halo kontrolu másimu ba patrimóniu Estadu, tanba ne’e sei sirkula livremente ba iha pesoál nian”, hateten.
Nune’e, notifika ona utilizadór sira no husu parte lojístika husi instituisaun Estadu sira atu kontrola.
Adjuntu Komisáriu Anti-Korrupsaun, Rosário Salsinha Araújo, reforsa katak iha dekretu-lei ne’ebé iha fó énfaze hodi hatuur regra lubun ba autoridade públika hahú husi Prezidénsia Repúblika to’o Sekretáriu Estadu ba servidór ho profisionál, polítika, hotu-hotu tenke kumpre.
No iha Lei Medida Prevensaun no Kombate Korrupsaun (MPKK) iha artigu 83 kona-ba pekulatu uzu. “Ema ne’ebé uza sala patrimóniu Estadu nian ba privadu bele kriminaliza tinan 2 to’o 6”, afirma.
Tuir dadus, ekipa konjunta dezde Maiu tinan ne’e rejista irregularidade 71 kona-ba veíkulu Estadu ne’ebé sirkula laiha oras serbisu.
Jornalista: Nelson de Sousa
Editora: Maria Auxiliadora
