DILI, 24 Novembru 2025 (TATOLI)—Governu liuhusi Ministru Transporte Komunikasaun (MTK), Miguel Gonçalves Manetelu, segunda ne’e, entrega karreta Ambulift ba Administrasaun Navegasaun Aérea Timor- Leste, Empreza Públika (ANATL, E.P) hodi fasilita atendrmentu ba pasajeiru ne’ebé kondisaun moras hodi sae no tuun liuhusi eskadaria ba aviaun.
Ministru Transporte Komunikasaun, Miguel Gonçalves Manetelu, hateten karreta ne’e ita prepara bainhira vizita santidade Papa Francisco nian mai Timor hodi fasilita movimentu tuun-sae husi aviaun atu uza eskada karreta Ambulift nian, no karreta ne’e iha altura ne’ebá Ministériu Administrasaun Estatál mak halo prosesu ho Orsamentu Jerál Estadu nian.
“Tamba ne’e, ita haree katak karreta ne’e paradu hela no la uza, entaun ho ida ne’e mak Ministériu Transporte Komunikasaun liuhusi ANATL sei uza hodi halo operasaun ba pasajeiru ne’ebé kondisaun moras no defisiénsia hodi halo movimentu tuun-sae husi aviaun iha aeroportu,” Ministru Manetelu informa ba Agência Tatoli iha nia kna’ar fatin, Kaikoli, ohin.
Governante ne’e dehan, karreta ida-ne’e sei fasilita ba ajénsia sira-ne’ebé hala’o servisu iha aeroportu maibé la’ós ho gratuita maibé sira sei selu tarifa bainhira uza krareta Ambulift ne’e. Kona-ba tarifa seidauk define loloos, ida-ne’e depois mak ANATL sei determina no koordena ho ajénsia sira.
“Nune’e, ha’u husu ba ANATL atu kuidadu didi’ak karreta ne’e tanba patrimóniu Estadu nian tenke uza to’o tempu naruk,” nia apela.
Prezidente Interinu ANATL, Marco Paulo dos Reis Faria de Sousa, hato’o agradesementu ba Ministériu tanba bele oferese ona karreta Ambulift ida-ne’e hodi ajuda fasilita servisu ajénsia nian iha aeroportu ba atendementu pasajeiru ne’ebé kondisaun moras bainhira halo movimentu iha aviaun.
“Ami sei jere no kuidadu didi’ak patrimónou Estadu ida-ne’e, atu nafatin fasilita to’o tempu naruk. Tanba, durante ne’e ami mós difikuldade hodi hasa’e no hatun pasajeiru sira-ne’ebé ho kondisaun moras,” nia dehan.
Jornalista : Alexandra da Costa
Editór : Cancio Ximenes
