MAE solisita PAM jere OJE 2026 haree koziña no refeitóriu merenda eskolár
DILI, 24 Novembru 2025 (TATOLI)—Vise-Ministru Administrasaun Estatál, Jacinto Rigoberto solisita Prezidente Autoridade Munisípiu (PAM) sira hotu atu jere Orsamentu Jerál Estadu (OJE) 2026 nian hodi haree ba koziña no refeitóriu ba merenda eskolár iha territóriu.
“Eskola barak iha munisípiu no orsamentu prioridade munisipál nian mós barak, tan ne’e labele responde ba programa merenda eskolár hotu. Entaun, fazeadamente sira hadi’a daudaun kondisaun koziña (dapur) ne’ebé mak aat. Ne’e ami sujere favór ida tau-atensaun ba dapur hodi garante ijiene ba fornesimentu merenda eskolár ba ita-nia estudante sira,” Vise-Ministru Jacinto dehan ba TATOLI iha resintu Ministériu Administrasaun Estatál (MAE), Kolmera, Dili, Segunda ne’e.
Ministru Jacinto dehan daudaun ne’e nia ho ekipa kompostu husi gabinte administradór no xefe suku balun bá halo hela estudu komparativu iha Indonézia hodi gaña referénsia.
“Sira bá halo estudu komparativu iha Indonézia kona-ba hahán nutritivu, depoiz fila-mai halo workshop ida hodi kompartilla esperiénsia Indonézia nian,” nia haktuir.
Govenante ne’e salienta programa merenda eskolár kontrolu hosi MAE maibé orsamentu ne’e prevee ba kada autoridade munisipál ho montante millaun $1-resin maibé depende mós ba númeru estudante.
“Agora ami-nia papél mak oinsá superviziona no monitoriza implementasaun ne’e tuir polítika no matadalan ne’ebé mak ita iha ka lae,” nia katak.
Tuir Jacinto, durante ne’e halo fiskalizasaun iha terrenu hasoru duni situasaun sira hanesan implementasaun la tuir menu ne’ebé iha.
“Balun ita bá haree kapa’as tebes maibé ba sira-ne’ebé iha produtu lokál sira kompletu. Balun fali hanesan iha Munisípiu Ermera, sira-ne’ebá ne’e iha menu tenke foos rai, maibé foos rai laiha entaun sira tau fali foos ne’ebé mak fásil bá sira atu asesu. La’ós ida-ne’e de’it. Balun kona-ba fatin te’in sira-ne’e hotu ami haree iha munisípiu hotu di’ak, maibé iha eskola balun presiza tau-atensaun,” nia hateten.
Implementasaun merenda eskolár iha kada munisípiu ne’ebé relata iha debate orsamentu 2026 katak kuaze hotu-hotu atinje 70% bá leten. Enkuantu, orsamentu ne’ebé MAE prevee ba programa merenda eskolár 2025 nian hamutuk millaun $34.
Jornalista: Osória Marques
Editór: Xisto Freitas da Piedade
