Prezidente KKLN Kovalima husu veteranu simu pensaun uza ba nesesidade moris
KOVALIMA , 24 Novembru 2025 ( TATOLI)- Prezidente Konsellu Kombatente Libertasaun Nasional Munisípiu Kovalima, Osorio Soares “Mausoko” alerta ba veteranu sira iha Kovalima bainhira simu pensaun veteranu no martir auza ba nesesidade moris liuliu tu suporta oan sira ba eskola, la’os uza lori ba joga no hemu tua.
“Veteranu sira ne’ebé simu pensaun veteranu presiza atu suporta oan sira ba eskola, la’os ita-boot sira simu pensaun veteranu lori ba joga no hemu fali tua, ne’e ladun di’ak. Di’ak liu suporta oan sira ba eskola”, Prezidente Konsellu Kombatente Libertasaun Munisípiu Kovalima, Osorio Soares “Mausoko” hato’o ba jornalista iha AMC, ohin
Tanba, nia dehan edukasaun maka sai save ba dezenvolvimentu, se oan sira la eskola oinsá maka bele dezenvolve nasaun atu dezenvolve nasaun tenke liuhusi setór edukasaun.
Mausoko fó hanoin mós joven-sira atu labele envolve iha grupu arte marsiál no Grupu Arte Rituál hodi foku ba estuda tanba nasaun iha joven-sira nia liman no labele ansi atu sai lideransa.
“Ha’u nia mensajen ba joven sira nasaun iha ita-boot sira-nia liman, joven sira foku atu ba estuda, labele ansi atu sai lidér, tanba atu sai lidér seidauk iha opornidade importante maka estuda no labele envolve Grupu Arte Marsiál no Arte Ritual, tanba ukun rasik aan dala ida de’it,” nia afirma.
Tuir dadus iha Konsellu veteranu Kombatente Libertasaun Kovalima hatudu veteranu no martir mai husi postu administrativu hitu ne’ebé ativa simu subvensaun kada fulan iha Banku Nasional Ultra Marino no Banku Nasionál Komérsiu Timor-Leste iha munisípiu Kovalima hamutuk 2000-resin.
Jornalista: Celestina Teles
Editór : Florencio Miranda Ximenes
