Universidade Link Roma nomeia Ramos-Horta sai profesór hodi reforsa advokasia pás globál
DILI, 24 Novembru 2025 (TATOLI)—Universidade Link Roma nomeioa Prezidente Repúblika, José Ramos-Horta, sai profesór hodi reforsa advokasia pás globál.
Hanesan konvidadu onra no membru fakuldade foun iha Università degli Studi Link, Prezidente nia prezensa sai ankora ba eventu boot ida-ne’ebé dedika ba rezolve konflitu globál, iha ne’ebé nia aprezenta “lectio magistralis” tuir painél sira-ne’ebé analiza krize kontemporánea no kazu estudu fundamenál kona-ba Timor-Leste nia viajen hodi sai demokrasia foun ida iha mundu.
Tuir nota ne’ebé TATOLI asesu ne’e haktuir, Prezidente Ramos-Horta simu ofisiálmente nomeasaun hanesan Profesor ba ensinu “Rezolve Konflitu no Dalan ba Pàs” iha Universidade Link.
Papel akadémiku foun ne’e rekoñese formálmente Prezidente nia dédikasaun sira ba diplomasia laiha-violénsia no advokasia la-kolen atu liberta ninia nasaun iha palku internasionál.
Serimónia ne’e mós marka anúnsiu kona-ba parseiru foun ida entre Fundação Universidade Link Kampus no universidade sira iha Timor-Leste, promete atu reforsa liután ligasaun edukasaun no diplomátika entre nasaun rua ne’e.
Prezidente nia envolvimentu iha Universidade Link la’ós de’it hasa’e Timor-Leste nia perfíl globál maibé mós fornese plataforma distingidu ida atu fahe ninia esperiénsia boot, hetan diretamente husi ninia esperiénsia iha luta naruk no dramátiku ba liberdade.
Liuhusi simu profesoradu prestijiozu ne’e, Prezidente Ramos-Horta garante katak prinsípiu sira kona-ba envolvimentu laiha-violénsia no rekonsilasaun ne’ebé halo Prezidente simu Prémiu Nobel Paz iha tinan 1996 sei kontinua inspira no eduka jerasaun oin mai nian líder globál no diplomata sira.
TATOLI
