Autoridade Kovalima husu MOP prioriza hodi reabilita estrada iha postu-sira
KOVALIMA, 25 Novembru 2025 (TATOLI)- Prezidente Autoridade Munisípiu (PAM) Kovalima, Miguel Armada Cardoso, husu ba Ministru Obra Públiku (MOP), Samuel Marçal, atu fó prioridade mós reabilitasaun estrada husi kapitál munisípiu liga ba postu administrativu sira ne’ebé maka pertensa ba Munisípiu Kovalima.
“Ministru Obra Públiku (MOP) tau matan mós estrada iha ami nia postu administrativu sira hanesan iha postu administrativu iha parte fronteira iha Tilomar liga ba Fatumea,Liga ba Fohorem no estrada Maucatar liga ba postu administrativu Fatululik”, Autoridade Kovalima hato’o rekomendasaun ne’e liuhusi nia diskursu iha serimónia lansamentu fatuk ba dahuluk reabilitasaun estrada Casa mai iha Zumalai, iha postu Zumalai, Munisípiu Kovalima.
Autoridade dehan, Governu lansa ona fatuk ba dahuluk estrada protokolu sira,maibé presiza haree mós estrada sira liga husi kapitál munisípiu ba iha postu administrativu sira ne’ebé pertense ba munisípiu Kovalima.
Hataan ba Kestaun ne’e, Ministru Obra Públiku, Samuel Marçal, klarifika, presiza duni atu responde ezijénsia husi Komunidade kona-ba hadi’a estrada, maibé presiza ho nia prosesu tenke tuir lei ne’ebé maka vigór.
“Ita realiza kedas prosesu hotu ita iha ita-nia lei, sistema, regra parte ida hanesan fundamentu ba ita-nia Estadu. Nune’e bainhira ita hakarak halo dezenvolvimentu ita sobu ita-nia sistema labele”, Governante ne’e esplika.
Jornalista:Celestina Teles
Editór:Florencio Miranda Ximenes
