DILI, 25 Novembru 2025 (TATOLI)—Governu liuhusi Ministériu Transporte Komunikasaun kontinua implementa programa 2026 hodi halo prosesu konkursu públiku ba estudu viabilidade ba projetu konstrusaun no reabilitasau iha portu, terminál transporte públiku no aeroportu rejionál.
Ministru Transporte Komunikasaun, Miguel Gonçalves Manetelu, hateten estudu viabilidade ne’e sei halo prosesu konkurdsu públiku iha CNA ba portu Ataúro, entaun estudu viabilidade hotu tiha mak foin haree katak ninia konstrusaun ne’e viavel ka lae, entaun estudu viabilidade ne’e halo dahuluk ba portu Ataúru.
“Kona-ba portu Kom-Lautein nian tanba antes ne’e estudu viabilidade halo tiha ona husi MAPPF ne’ebé hetan apoiu husi COICA, entaun ami sei foti de’it rezultadu estudu viabilidade nian no sei avansa iha tinan 2026. Bainhira dekretu-lei ba ezekusaun aprova ona, ita sei avansa halo konkursu públiku ba dezeñu, katak halo konkursu mak kompañia ida manán ne’e prepara dezenu hodi kontinua halo konstrusaun,” Ministru Manetelu informa ba jornalista sira iha Bebonuk, ohin
Governante ne’e dehan, portu iha Kairabela-Vemasse-Baucau ne’e, Governu halo konstrusaun la’ós reabilita no fonte orsamentu sei mai husi JICA, Estadu tau de’it orsamentu ba kontra partida rihun $500.
Aleinde ne’e, nia informa, iha tinan 2026, Governu sei halo mós estudu vialibidade ida ba portu Manatutu.
Prosesu konstrusaun terminál transporte públiku iha faze dezenu
Aleinde ne’e, ministru informa kona-ba prosesu konkursu públiku dezeñu ba terminál transporte públiku, antes ne’e Governu lansa tiha ona ninia estudu viabilidade entaun agora ne’e avansa ona ba preparasau dezeñu nian, bainhira prosesu hotu ona mak sei kontinua lansa konkursu públiku ba konstrusaun.
Tuir planu, Governu sei konstrui terminál tolu mak iha parte leste sei konstrui iha Akanunu-Hera tanba rai ne’e Diresaun Nasionál Transporte Terrestre (DNTT) nian, iha parte súl sei konstrui iha merkadu Manleuana nia sorin no iha parte oeste nian atu halo iha Tasi-Tolu no Tibar maibé Ministériu Justisa seidauk iha resposta, tanba rai ida iha Tibar ne’e Ministériu Justisa atribui ona ba investór atu halo investimentu.
“Agora ami seidauk haree rai, maibé se ha’u lahetan rai entaun ita sei uza nafatin terminál antigu (tuan) iha Tasi-Tolu,” nia dehan.
Governu halo estudu viabilidade ba aeroportu rejionál
Nia hatutan prosesu estudu viabilidade mós la’o hela atu halo prosesu konkursu públiku ba aeroportu rejionál iha munisípiu haat hanesan Lautein, Vikeke, Manufahi no Bobonaru, tanba fatin sira ne’e mak eziste aeroportu iha tempu uluk kedas.
Nia mós iha inisiativa atu dezenvolve aeroportu rejionál iha Ataúru, atu nune’e aviaun kiik sira bele halo operasaun tula pasiente sira-ne’ebé moras.
Jornalista : Alexandra da Costa
Editór : Cancio Ximenes
