Kulugisa FC iha zona mean, AD SLB lidera hikas tabela klasifikasaun LFFTL

November 25, 2025
04:33 PM
Facebook Instagram X WhatsApp Telegram

*Tabela klasifikasaun jornada dalimak primeira divizaun LFFTL. Imajen espesiál*

DILI, 25 Novembru 2025 (TATOLI)—Ekipa futeból femininu Kulugisa to’o jornada dalimak kontinua iha zona mean pozisaun dasanuluk, enkuantu AD SLB Laulara lidera hikas tabela klasifikasaun primeira divizaun Liga Futeból Femininu Timor-Leste (LFFTL).

Ekipa Kulugisa ne’ebé reprezenta Munisípiu Baukau hala’o ona jogu dalimak ho pontu 0 hafoin derrota dalimak ho skor boot hanesan jornada dahuluk kontra VDL FC 4-0, Akadémika 0-4, S’amuser FC 24-0, Buibere 14-0 no jornada dalimak derrota tan ho Maudoko 0-12 ho totál produtividade menus -58.

Enkuantu, AD SDB ne’ebé iha jornada datoluk to’o dahaat iha pozisaun datoluk hakat hikas lidera pozisaun dahuluk iha jornada dalimak hafoin manán Akadémika 11-0 hafoin rekolla produtividade golu +44 ho pontu 13, rezultadu manán haat 4 no impata ida (1).

Ekipa husi Laulara ne’e iha jogu haat manán ho ho skor boot hanesan kontra UNITAL 9-0, Na’in-Feto FC 0-11, VDL 14-1, Akadémika 0-11 no impata ho Maranatha 1-1.

Aleinde ne’e, iha pozisaun daruak lidera husi Buibere FC ho pontu 13, rezultadu manán haat (4) no impata ida (1) no rekolla golu +42, enkuantu iha pozisaun datoluk okupa husi S’amuser FC ho pontu 13, rezultadu manán haat (4) no impata ida (1) no rekolla golu +37.

Maudoko FC rekolla pontu 13 hodi okupa iha pozisaun dahaat (4) hafoin manán haat (4), impata ida (1) no produtividade golu +29, enkuantu Maranatha FC iha pozisaun dalimak ho pontu ualu (8), rezultadu manán rua (2), impata rua (2) no derrota ida (1).

UNITAL FC ne’ebé antes ne’e derrota ho skor boot hahú hakat bá pozisaun daneen iha tabela klasifikasaun ho pontu neen (6), rezultadu manán rua (2) no derrota tolu (3), enkuantu ekipa Akadémika iha pozisaun dahitu no VDL daualu hafoin ekipa rua ne’e pontu hanesan (3), rezultadu manán 1 no derrota 4.

Entretantu, ekipa Na’in-Feto FC ne’ebé foin promovidu ba primeira divizaun to’o jornada dalimak kontinua okupa iha pozisaun dasiak hafoin jogu lima derrota ho pontu 0.

Jornalista: Natalino Belo

Editór: Xisto Freitas da Piedade