DILI, 25 Novembru 2025 (TATOLI)-Deputada husi Partidu Kongresu Nasionál Rekonstrusaun Timorense (CNRT), Cedelízia Faria dos Santos, preokupa ho Automatic Teller Machine (ATM) husi Banku Nasionál Komérsiu Timor-Leste (BNCTL, sigla portugés) ne’ebé avaria iha loron hirak ne’e.
“Ha’u preokupa ho ita-nia BNCTL. Loron hirak ne’e ema barak, kuaze enfrenta ho ATM. Ita akompaña lideransa sira BNCTL halo ona konferénsia imprensa, ko’alia kona-ba falla ne’ebé akontese”, nia levanta iha reuniaun plenária Parlamentu Nasionál (PN), ohin.
Deputada ne’e husu ba BNCTL atu toma atensaun, liuliu ba IT ka sistema ne’ebé iha, nune’e ba oin labele difikulta kliente sira.
Iha fatin hanesan deputada husi Partidu Demokrátiku (PD), Sanhia Tilman, husu ba jestór banku atu hadi’a sistema, liuliu disponibiliza serbisu ATM hodi funsiona ho di’ak iha tempu ne’ebé de’it. “Maibé, iha semana kotuk kedas nia falla to’o agora”, nia preokupa.
Deputada husi Partidu Kmanek Haburas Unidade Nasionál Timoroan (KHUNTO), Irene Gonzaga, mós lamenta ho mákina ATM iha Díli laran kuaze avaria to’o horisehik no situasaun ne’e sempre akontese.
Nia preokupa mós kona-ba sistema ko’a osan bainhira halo levantamentu liuhusi ATM. Nune’e husu ba funsionáriu sira iha sukrusál sira atu mellora atendimentu servisu di’ak ba kliente sira.
Deputadu CNRT, Domingos Augusto ‘Deker’, rekomenda ba BNCTL atu hadi’a mentalidade funsionáriu sira-nia, nune’e halo atendimentu ho profisionál. “Iha nesesidade, BNCTL presiza iha obrigasaun atu hasa’e imunidade sistema nian”, nia sujere.
Notísia relevante: BNCTL rejista kréditu rihun 300-resin ho sirkulasaun osan millaun $500-resin
Jornalista: Nelson de Sousa
Editora: Maria Auxiliadora
