DILI, 25 Novembru 2025 (TATOLI)-Komisaun C arlamentu Nasionál ne’ebé trata Asuntu Finansa Públika halo ona redasaun finál ba proposta Lei Orsamentu Jerál Estadu (OJE) 2026.
“Horsehik loraik, ami Komisaun, marka mós prezensa husi Ministra Finansa, halo ona redasaun finál no aprovasaun. No ami fó ona ba Prezidente Parlamentu, espera tarde liu loraik ou aban bele haruka ona ba Prezidente Repúblika [PR] hodi halo promulgasaun”, Prezidente Komisaun C, Cedelízia Faria dos Santos, informa iha Parlamentu, ohin.
Durante diskusaun iha espesialidade, iha proposta lubun mak pasa, nune’e iha redasaun finál halo armonizasaun. “Maioria proposta ne’ebé pasa mak hasai osan millaun $5 husi pensaun vitalísia nian, ne’ebé koloka fali ba área produtiva sira”, dehan.
Hodi salienta katak OJE 2026 ninia tetu inisiál mantein, muda de’it mak iha kategória balun ba kategória seluk no programa balun ba programa seluk.
Lembra katak, iha 21 Novembru, Parlamentu Nasionál liuhusi reuniaun plenária estraordinária, aprova ona proposta Orsamentu Jerál Estadu tinan fiskál 2026 ho montante $2.214.689,195 iha finál globál ho votu a favór 42, kontra 0 no abstensaun 23 husi FRETILIN no PLP.
Orsamentu ne’e aloka ba saláriu no vensimentu $476.870.249, bens no serbisu korrente $447.904.446, transferénsia públika $820.710.160, kapitál menór $32.556,96, no kapitál dezenvolvimentu $436.647.379.
Notísia relevante: PN aprova proposta OJE 2026 iha finál globál
Jornalista: Nelson de Sousa
Editora: Maria Auxiliadora
