Embaixada Kuba selebra tinan sia falesimentu El Komandante Fidel Castro
DILI, 26 Novembru 2025 (TATOLI)–Embaxada Kuba iha Timor-Leste, kuarta ne’e, selebra falesimentu El Komandante Fidel Castro ne’ebé kompleta ona tina sia (9) iha edifisiu Embaixada Kuba, Faról, Dili.
Serimónia ne’e, Embaxada Kuba konvida Prezidente Repúblika José Ramos-Horta hodi hato’o mensajen no fahe esperiensia kona-ba iha tempu pasadu sempre hasoru malu direita ho Fidel Castro.
Durante diskursu Prezidente Repúblika Ramos-Horta hateten, Fidel Castro ema ida ne’ebé sempre husik legadu barak ba mundu mak solidaridade umanu no ba Timor-Leste mak apoiu nasaun ne’e nia luta ba independensia.
“Fidel Castro ema ida ne’ebé sempre apoiu Timor-Leste nia luta ba independensia, bainhira ita independensia Kuba nafain apoiu ita iha setór saúde, fó bola estudu ba timoroan sira ba estuda iha área medisina, ida ne’e legadu ne’ebé Fidel Castro husik hela mai ita,” Ramos-Horta hateten iha nia diskursu.
Xefe Estadu ne’e subliña, Kuba nia apoiu ba Timor-Leste la’ós de’it iha área saúde maibé iha mós área edukasaun no haruka timoroan barak ba estuda iha Kuba no profesósr kubanu barak hanorin iha Universidade Nasionál Timor-Lorosa’e (UNTL) iha área edukasaun fízika.
Embaxadora Kuba mai Timor-Leste Grisel Alina Aldama Innis hateten, selebrasaun ne’e hodi hanoin hikas tinan sia (9) El Komandante Fidel Castro nia falesimentu.
“Serimonia ne’e hodi hanoin hikas Komandante Fidel Castro nia falesimentu, ami konvida Prezidente Ramos-Horta mai ne’e atu fahe nia esperiensia tanba nia ema ne’ebé uluk sempre hasoru direita ho Komandante Fidel Castro,” Embaxadora ne’e hateten.
Diplomata kubana ne’e argumenta, husi legadu ne’ebé Komandante Fidel Castro husik hele ba Timor-Leste, Kuba sei firme iha pozisaun hodi hatutan nafatin.
Relasaun Kuba ho Timor-Leste kontinua metin no Kuba prontu nafatin apoiu Timor-Leste iha setór saúde no edukasaun hodi tulun Timor-Leste nia dezenvolvimentu.
Rekorda fali katak, iha tinan 2010 Estadu Timor-Leste atribui medalla Grande Kolar Orden Timor-Leste ba Fidel Castro hodi fó onra ba apoiu ne’ebé Fidel Castro fó ba Timor-Leste no Fidel Castro sai inspirasaun ba ema barak durante luta ba autodeterminasaun no apoiante ativu ba nasaun nia dezenvolvimentu.
Entretantu, Fidel Castro ne’eb’e moris iha 13 Agostu 1926 ne’e hakotu nia peregrinasaun iha mundu iha loron 26 fulan-Novembru 2016 ho idade 90.
Jornalista : Hortencio Sanchez
Editór : Cancio Ximenes
