Empreza Aitula finaliza ona projetu konstrusaun eskola CAFE iha Kovalima
KOVALIMA, 26 Novembru 2025 (TATOLI)- Empreza Aitula finaliza ona projetu konstrusaun eskola CAFE iha Kovalima, maibé seidauk entrega ba Governu tanba hein hela verifikasaun ka aprovasaun ikus husi administrasaun munisipal..
“Prosesu konstrusaun eskola CAFE iha munisípiu Kovalima finaliza ona iha 2024 , mas empreza seidauk entrega konstrusaun edifisiu eskola tanba tarde aprova prosesu administrasaun”, Diretór Empreza Aitula , Silveiro Pereira Maubere esplika ba jornalista iha Kovalima.
Dirijente empreza ne’e mós informa, nia parte hetan ona kontaktu husi servisu munisípiu edukasaun Kovalima, nune’e iha tempu badak empreza sei entrega konstrusaun edifísiu eskola CAFE iha munisípiu Kovalima.
“Ha’u hetan ona kontatu husi servisu Munisípiu Edukasaun Kovalima iha tempu badak atu entrega xave eskola CAFE-Ladi Kovalima iha Dezembru ne’e”, nia dehan.
Iha sorin seluk, Diretora Servisu Munisípiu Edukasaun Kovalima, Elda de Fátima reforsa katak empreza Aitula finaliza ona konstrusaun edifísiu eskola CAFE,tuir lolos entrega ona.
“ Ha’u kontaktu ona empreza Aitula iha tempu badak atu inaugura ona tanba konstrusaun eskola finaliza ona kompleta ho nia fasilidade mobiliariu kada saladeaula no mós prosesu administrasaun tanba ho tékniku sira husi nasionál empreza hahú konstrui iha 2023 ne’ebé finaliza iha 2024”, nia afirma.
Iha 2023 , Orsamentu reabilitasaun no konstruisaun edifísiu Eskola 15 mai husi Orsamentu Jerál Estadu 2021 ne’ebé prevee iha transferénsia públika hamutuk milliaun $1,6 ho grande projetu nia orsamentu mai husi rubrika kapital dezenvolvimentu ne’ebé konstrui eskola CAFE haat.
Ho nune’e, orsamentu ba konstruisaun eskola CAFE iha munisipiu Kovalima ho total saladeaula hamutuk 12, kompleta ho saniamentu orsamentu hamutuk $820,206,62.
Jornalista:Celestina Teles
Editór:Florencio Miranda Ximenes
