DILI, 26 Novembru 2025 (TATOLI)—Sekretária Estadu Formasaun Profisionál no Empregu (SEFOPE) seidauk simu karta ofisiál kona-ba krize ekonomia iha Nova Zelándia, nune’e konsidera sei la fó impaktu ba prosesu rekrutamentu traballadór programa RSE.
Notísia Relevante: SEFOPE hahú fó teste ba kandidatu traballadór Nova Zelandia na’in-11
Diretór Jerál Sekretáriu Estadu Formasaun Profisionál no Empregu, Carlito Rosário Cabral, hateten iha inofrmasaun balun ne’ebé haktuir kona-ba problema ne’ebé daudaun ne’e Nova Zelándia hasoru hanesan krizi ekonomia, maibé Governu Timor-Leste liuhusi SEFOPE seidauk iha informasaun formál husi Governu Nova Zelándia nian ba asuntu ida-ne’e.
“Ita seidauk simu informasaun husi Nova Zelándia kona-ba asuntu ida-ne’ebé sei fó influénsia negativu ba mobilidade laborál, nune’e prosesu rekrutamentu ba traballadór ne’ebé atu ba servisu iha Nova Zelándia kontinua la’o normál hela,” Diretór Jerál ne’e informa ba Agência Tatoli iha nia kna’ar fatin, Kaikoli, ohin.
Bainhira SEFOPE hetan ona karta formál ida husi Governu Nova Zelándia kona-ba asuntu ne’e mak SEFOPE sei foti asaun hodi hapara lai prosesu rekrutamentu, maibé tanba koordenasaun ne’e entre Governu ho Governu, ho nune’e mak kuandu seidauk simu karta ruma, entaun prosesu rekrutamentu kontinua la’o.
“Nune’e, ita kontinua prepara joven sira atu envolve iha programa laborál ida-ne’e, tanba tinan oin kompañia sira sei mai halo tan rekrutamentu, maske ho kuantidade ne’ebé sei natoon,” nia hateten.
Daudaun ne’e, ninia prosesu to’o iha faze entrevista, iha kandidatu balun mak entrevista hotu ona no balun foin tuir entrevista, tuir planu iha tinan ida-ne’e Governu sei haruka traballadór etapa dahuluk mak ba uluk no etapa daruak nian sei dezloka iha tinan oin, depende ba desizaun husi empregadór nia nesesidade atu presiza traballadór na’in hira.
Jornalista : Alexandra da Costa
Editór : Cancio Ximenes
