VIKEKE, 26 Novembru 2025 (TATOLI)-Estensionista Suku Uma-Ki’ik, Postu Administrativu Vikeke Vila, Munisípiu Vikeke, Agostinho Pinto Mascarinhas, informa Servisu Ministériu Agrikultura, Peska, Pekuária no Floresta (MAPPF) sei kuda ai-fuan salak hamutuk hun 4.000 iha área Tahu Bein, Suku Uma-Ki’ik.
“Ita servisu hamutuk ho grupu agrikultór Tahu Bein husi Suku Uma-Ki’ik ba tinan ida-ne’e sei kuda ai-fuan salak hamutuk hun 4.000 ne’ebé sai hanesan programa pilotu,” Agostinho ba TATOLI iha Postu Vikeke Vila, Kuarta ne’e.
Agostinho dehan, liga ba preparasaun kuda salak, daudaun ne’e SMAPPF Vikeke apoia tratór boot tolu hodi fila-rai hodi prepara kuda salak referidu no sei okupa rai hamutuk ektare tolu.
“Kona-ba fini salak ne’e ita-nia MAPPF nasionál mak sosa hodi distribui mai Vikeke. Agora daudaun ne’e salak hamutuk hun 3.000 mak iha ona terrenu, depoiz sei distribui tan 1.000. Programa kuda salak ne’e ami sei akompaña hahú husi preparasaun rai, kuda to’o kolleta. Ita sei implementa tuir sistema Pratika Agrikultura Di’ak (PAD),” Agostinho relata.
Nia esplika durasaun kolleta salak fuan bele to’o tinan lima ka neen.
Durante ne’e, Agostinho haktuir, MAPPF foku liubá ai-han, entaun menus ai-fuan. Tan ne’e, Ministériu ninia alvu ida mak oinsá hasa’e produsaun ba ai-fuan sira.
Tuir planu, programa kuda salak ne’e aban (27 Novembru), MAPPF no Autoridade Munisípiu Vikeke sei halo lansamentu ofisiál iha área Tahu Bein.
Enkuantu, Grupu Tahu Bein iha membru hamutuk 15 no sei akompaña husi estensionista Munisípiu Vikeke ba programa kuda salak.
Jornalista: Vitorino Lopes da Costa
Editór: Xisto Freitas da Piedade
