KOVALIMA, 26 Novembru 2025 (TATOLI)- Organizasaun Noun Governametál (ONG) Belun, hamutuk ho Governu disemina informasaun kona-bá adezaun Timor-Leste ba ASEAN ba entidade sira iha munisípiu Kovalima.
ONG Belun ho nia parseiru Governu ne’ebé hetan apoiu fundu husi Gabinete Apoiu Sosiedade Sivil (GASC) , iha mahon Gabinete Vise-Primeiru Ministru asuntu sosiál, Ministériu Negosiu Estranjeiru no Kooperasaun (MNEC), Ministériu Juventude Desportu Arte no Kultura (MJDAK), Sekretariadu G7+ no Autoridade lokál iha Kovalima.
“Ami hamutuk ho parseiru xave husi nasionál disemina informasaun kona-ba adezaun Timor-Leste ba ASEAN ba autoridade lokál joven sira no alunu sira, hodi konvida oradór xave sira fahe informasaun iha munisípiu Kovalima”, Diretór ONG Belun Luis Ximenes esplika ba jornalista sira iha salaun AMC, ohin.
Atividade disemina informasaun ne’e, kontinua habelár informasaun ba komunidade sira iha área rurál bele iha informasaun saida mak ASEAN no kondisaun saida maka Governu atu prepara no presiza implementa nu’udar membru ASEAN atu komunidade liliu Joven-sira bele hatene kontribuisaun no responsabilidade saida mak komunidade no joven-sira bele kontribui bele ajuda no fó susesu ba Timor-Leste ho ASEAN.
Oradór xave ne’ebé maka ONG Belun konvida maka hanesan,oradór ba dahuluk husi Sekertariadu ASEAN iha mahon husi Ministériu Negósiu Estranjeiru no Koopersaun (MNEC), koa’lia kona -bá Progresu, Dezafiu no Benefisiu adezaun Timor-Leste ba ASEAN ba Povu Timor- Leste no Oradór ba daruak husi Ministériu Juventude Desportu no Arte Kultura (MJDAK), ko’alia kona-ba “Oportunidade no Dezafiu Joven sira nian atu kompete ho Joven husi Nasaun Membru ASEAN sira seluk ho aliña Politika Nasionál Juventude”.
Diretór Nasionál Asosiativizmu Juventude (MJDAK), Mario Tilman, dehan Adezaun Timor-Leste ba ASEAN ne’e hanesan Nasaun nune’e MJDAK mós iha responsabilidade ba dezenvolvimentu joven-sira.
“MJDAK nia papél oinsá partilla informasaun kona-ba oportunidade, dezafiu no estratejia joven-sira atu kompete iha ASEAN hodi aliña ho polítika nasionál, ami mai sensibiliza oportunidade ne’ebé maka joven-sira iha atu hetan”, nia esplika.
Adezaun Timor-Leste ba ASEAN iha oportunidade molok sai observadór husi Ministériu partisipa iha diálogu nivél ASEAN hodi lori aspirasaun husi situasaun rai laran joven-sira, nune’e rekomenda ba lidér ASEAN atu fó atensaun.
“Atividade disemina informasaun oinsá bolu atensaun ba joven-sira atu prepara aan di’ak liu ita hotu hatene katak ASEAN nasaun ne’ebé maka identiku ho lian ofisiál maka inglés, tanba lian sai hanesan sasukat no sai dezafiu maibé oportunidade”, nia esplika.
Jornalista:Celestina Teles
Editór:Florencio Miranda Ximenes
