DILI, 26 Novembru 2025 (TATOLI)—Polísia Nasionál Timor-Leste (PNTL) liuhusi Tránzitu Seguransa Rodoviária Nasionál hamutuk ho Diresaun Nasionál Transporte Terrestre (DNTT) sei halo lejizlasaun hodi kontrola karreta ne’ebé para kleur iha dalan públiku.
Diretór Tránzitu Seguransa Rodoviária Nasionál, Superintendente Xefe Polísia António Mauluta hateten, antes ne’e implementa ona regra ba transporte para iha dalan protokolu husi Rotunda Prezidente Nicolau Lobato to’o Ponte Bj Habibie, bele to’o de’it minutu lima atu evita engarrafamentu iha dalan públiku.
“Husi Komandu nian ba oin ha’u sei halo koordensaun filafali ho DNTT tanba iha loron hirak liu ba ha’u hetan konvite Diretór Nasionál Seguransa Rodoviária MI nian, ami mós ko’alia kona-ba ida-ne’e ninia kontinuidade ita atu hahú fali,” Mauluta informa ba Jornalista sira iha ninia knaar fatin, Komandu Jerál PNTL, Kaikoli, Kuarta ne’e.
Notísia relevante : DNTT Vikeke instala sinál tránzitu iha Lugatoi evita asidente tráfegu
Nia nota, mosu preokupasaun públiku balun katak regra ne’e ladún implementa ho di’ak.
“Ida-ne’e la la’o tanba husi Diresaun Tránzitu Seguransa Rodoviária Nasionál no DNTT mak deside suspende lai hodi halo avaliasaun lai ba kestaun sira ne’ebé implementa ona. Ita halo tenke bazeia ba iha lejizlasaun ruma, tanba ema bele husu implementa bazeia ba baze legál saida, lei númeru hira. Tanba ne’e ita husik hela oituan lai, sei tuur hamutuk DNTT nune’e kria baze legál mak ita komesa implementa fali,” nia akresenta.
Mauluta dehan, ba kestaun ne’e presiza halo diploma ruma hodi nune’e halo tiha sosializaun ba públiku mak foin implementa.
Iha sorin seluk, António Mauluta dehan, PNTL preparadu fó seguransa ba konvidadu espesiál sira husi rai-li’ur ne’ebé sei partisipa iha komemorasaun tinan 50 Proklamasaun Independénsia.
“Ita daudaun iha ona orientasaun husi parte Komandante Komandu Operasaun mai iha Tránzituhodi ami prepara planu kona-ba batedores. Tanba ami Tránzitu Nasionál nia serbisu mak batedores ba ita-nia VIP no VVIP sira ne’ebé mai husi nasaun sira seluk,” nia katak.
Aleinde ne’e, simu ona pedidu ida husi Ministériu Negósiu Estrajeiru no Kooperasaun katak konvidadu espesiál balun husi Myanmar sei to’o iha loron 27 Novembru.
“Nune’e ha’u mós aprova ona orden serbisu ba ekipa ne’ebé atu halo batedores ba na’i-ulun boot husi Myanmar,” nia katak.
Jornalista : Natalino Costa
Editora : Julia Chatarina
