RHTO entrega ona konstrusaun EBC Dais ba autoridade Kovalima
KOVALIMA, 26 Novembru 2025 (TATOLI)- Raes Hadomi Timor-oan (RHTO), kuarta-ne’e, ofisiálmente entrega konstrusaun asesibilidade Eskola Bázika Centrál (EBC) Dais, iha Suku Belekasak, Postu Administrativu Maucata ba Autoridade Munisipiu Kovalima.
Diretór RHTO Nasionál João Zito , introdùs katak Raes Hadomi Timor-oan (RHTO) entrega konstrusaun asesibilidade tanba liuhusi kooperasaun husi povu Austrália hodi apoia finanseiru, nune’e hodi bele finaliza konstrusaun asesibilidade.
“Ita kontente liuhusi kooperasaun entre Estadu Timor-Leste ho povu Austrália liuhusi DIFAT. DIFAT komprometidu boot hodi investe iha Edukasaun inkluziva no iha inkluzaun defisiénsia”, Diretór RHTO, João Zito, hato’o ba Jornalista iha EBC Dais, iha Postu Maucatar.
RHTO hala’o serimónia entrega asesibilidade ho rampa haat,hand riil 12, instalasaun bee-moos no saniamentu no eletrisidade ba Eskola Bázika Centrál Dais, ne’ebé lokaliza iha Suku Belekasak, Postu Maucatar.
Konstrusaun asesibilidade iha EBC-Dais tanba RHTO hetan apoia hodi Governu Austrália ne’ebé finaliza ona no autoridade postu entrega ona ba eskola, nune’e bele fasilita alunu ema ho defisiénsia bele asesu ba edukasaun.
Orsamentu ba konstrusaun asesibilidade iha eskola ho nia orsamentu hamutuk rihun $10. ho totál alunu 507 husi númeru ne’e Ema ho Defisiénsia hamutuk na’in-sia ne’ebé sai benefisiáriu ba konstrusaun asesibilidade no aumenta tan númeru EhD atu asesu ba edukasaun.
Iha 2025 ne’e, Governu Austrália la’os investe de’it iha EBC Dais maibé iha eskola munisípiu Aileu no iha Rejiaun Administrativa Espesial Oekusi Ambeno (RAEOA) .
Autoridade postu Maucatar agradese ba RHTO
Reprezentante Administradór postu Administrativu Maucatar, Jesuino do Carmo, fó hanoin Diretora eskola EBC atu kuidadu konstrusaun asesibilidade no tenke halo manutensaun.
“Ami RHTO orgullu no ajuda ami nia komunidade espesial ba alunu EhD iha EBC-Dais hodi asesu edukasaun inkluzivu iha postu Maucatar-Kovalima ”nia dehan.
Autoridade postu administrativu husu ba RHTO atu kontinua konstrui asesibilidade iha de’it EBC Dais, maibé kotinua konstrui mós eskola sira seluk, nune’e bele fasilita alunu ne’ebé ho defisiensia sira bele asesu ba edukasaun.
Entretanty, Diretór Servisu Munisípiu Edukasaun Kovalima Elda de Fátima, hato’o agradese no husu dirijente eskola atu kuidadu obra no presiza halo manutensaun ba konstrusaun asesibilidade tanba iha orsamentu konsesaun eskolár.
“Dirijente no profesór sira iha EBC Dais obra ne’ebé maka konstrui kompletu ona ita-boot sira tenke kuidadu, tenke halo manutensaun tanba ita iha orsamentu konsesaun eskolár bainhira sees husi matadalan importante uza konsesaun,” nia fó hanoin.
Jornalista:Celestina Teles
Editór:Florencio Miranda Ximenes
