Lideransa Komunitária husu komunidade partisipa komemorasaun 28 Novembru
KOVALIMA, 27 Novembru 2025 (TATOLI)- Timor-Leste (TL) sei komemora loron proklamasaun Independénsia Unilaterál 28 Novembru 1975-28 Novembru 2025 ba dala 50 nune’e husu komunidade sira atu partisipa.
“ Ha’u fó hanoin ba komunidade rasik komemora 28 Novembru ne’e loron ne’ebé importante ba ita. Ita hotu tenke partisipa iha serimónia komemorasaun ne’ebé sei hala’o iha kampu Ladi”, Xefe Suku Camnasa ,Postu Administrativu Suai,Fernando Noronha dehan ba jornalista iha Camansa ohin.
Lideransa komunitáriu ne’e dehan, molok atu tama iha serimónia ofisial hanesan lideransa komunitáriu suku simu orientasaun husi autoridade postu atu orienta ba komunidade sira ida-idak dada bandeira iha ida-idak nia uma oin .
Tuir orientasaun ne’ebé xefi suku simu, hahú iha inisiu fulan Novembru atu orienta ba komunidade sira hotu ida-idak dada sira-nia bandeira RDTL , iha uma oin hodi komemora loron nasionál 28 Novembru ba dala-50.
Atu komemora loron Nasionál 28 Novembru Autoridade Munisípiu Kovalima forma komisaun organizadora hodi halo preparasaun ba komemora 28 Loron proklamasaun Independénsia ba dala-50 ho nia orsamentu hamutuk $ 10.500.’
Orsamentu $ 10.500 sei aloka ba seksaun 17 serimónia komemorasaun autoridade Kovalima ho postu administrativu Suai konsentra iha kampu ladi no postu administrativu neen komemora iha ida-idak nia postu admi nistrativu.
Aloka orsamentu ba postu Suai hala’o atividade hanesan desportu komunitária sae bua ba populasaun sira ,misa agradesimentu hafoin tau ai funan no sunu lilin iha momentu masakre Setembru Negro 1999.
Aloka orsamentu ba kada postu administrativu Zumalai maka $ 1.500 postu sira seluk aloka $ 1000 haree populasaun iha postu administrativu sira.
Jornalista:Celestina Teles
Editór:Florencio Miranda Ximenes
