Prezidente Ramos-Horta fó pose ba Manuel Serrano sai Embaixadór TL ba Portugál
DILI, 27 Novembru 2025 (TATOLI)—Prezidente Repúblika, José Ramos-Horta, kinta ne’e, fó pose ba Manuel Antonio Araújo Serrano nudar Embaixadór Foun Estraordináriu no Plenipotensiáriu Repúblika Demokrátika Timor-Leste (RDTL) nian ba Repúblika Portugal.
Prezidente Ramos-Horta hato’o nia konfiansa katak Embaixadór Serrano nia esperiénsia diplomátika ne’ebé kle’an sei kontribui signifikativamente ba aprofundamentu relasaun bilaterál entre Timor-Leste no Portugál.
“Ita-nia relasaun ho Portugál hanesan pilár fundamentál ida ba ita-nia polítika esterna, ne’ebé harii iha istória, kultura no lian partillada. Embaixadór Serrano nia lideransa no abilidade diplomátika ne’ebé komprovadu sei sai instrumentál hodi avansa kooperasaun no promove oportunidade foun ba kolaborasaun,” Horta hateten iha nia diskursu iha Palásiu Prezidnsiál Nicolau Lobato, Bairru Pite.
Relasaun bilaterál entre Timor-Leste no Portugál nu’udar parseria profunda ho abut iha istória, lian, no kultura ne’ebé partillada.
Ligasaun ida-ne’e reforsa husi akordu bilaterál 77 no programa kooperasaun estratéjika ida-ne’ebé ativu dezde 2011.
Portugál nia apoiu indispensável iha setór krítiku sira hanesan edukasaun, justisa no defeza, kombina ho diálogu polítiku ho nivel aas no konsistente, halo Timor-Leste sai parseiru internasionál ida-ne’ebé vital no sustentável liu.
Nomeasaun ba embaixadór Manuel Antonio Araujo Serrano reafirma kompromisu Timor-Leste nian hodi hametin relasaun sira-ne’e iha nível bilaterál no iha Komunidade País sira Lian Portugés (CPLP).
Esperiensia
Embaixadór Manuel Antonio Araújo Serrano nu’udar diplomata ho ninia karreira inklui kna’ar signifikativu sira iha fundasaun nomós iha Governu, tanba serbí ona nu’udar Prezidente “Fundasaun Xanana Gusmão” husi tinan 2002 to’o 2006, Xefe Gabinete ba Ministru Seniór no Ministru Negósiu Estranjeiru no Kooperasaun, José Ramos-Horta, husi tinan 2006 to’o 2008, Diretór ba Komisaun Verdade no Amizade (CVA) entre Timor-Leste no Indonézia, no nu’udar Konsul-Jerál RDTL nian iha Denpasar, Bali (2006-2008).
Ninia kargu diplomátiku aas liu mak nu’udar Embaixadór Estraordináriu no Plenipotensiáriu Repúblika Demokrátika Timor-Leste nian ba Repúblika Indonézia husi tinan 2009 to’o 2016.
Foin lalais ne’e, Embaixadór Manuel Serrano nu’udar Diretór-Jeral SNI iha Gabinete Primeiru-Ministru (2017-2021), no servisu nu’udar Konselleiru ba Vise-Primeiru-Ministru no Ministru Koordenadór Asuntu Sosiál no Asuntu Ekonomiku husi tinan 2023 to’o 2025.
Jornalista : Hortencio Sanchez
Editór : Cancio Ximenes
