Prezidente Ramos-Horta promulga ona OJE 2026 biliaun $2,291
DILI, 27 Novembru 2025 (TATOLI)—Prezidente Repúblika. José Ramos-Horta, kinta ne’e, promulga ona Orsamentu Jerál Estadu (OJE) 2026 ho montante biliaun $2,291.
“Ha’u hasoru malu ho Prezidente Parlamentu Nasionál, nia lori orsamentu 2026 nian, ha’u simu no asina kedan iha nia oin, ha’u promulga kedan,” Ramos-Horta hateten ba jornalista sira iha Palásiu Prezidensiál Nicolau Lobato, Bairru Pite.
Nia dehan, maske públiku kestiona kona-ba OJE ne’e, nusa Xefe Estadu la lee, maibé Ramos-Horta hatán ho razaun katak nia parte la presiza lee tanba durante ne’e akompaña hela prosesu debate OJE 2026 iha Parlamentu Nasionál,
“Públiku kestiona nusa la lee lai orsamentu ne’e, ha’u dehan ha’u akompaña fulan hira nia laran prosesu sira hotu durante debate ne’e, loloos Prezidente Repúblika hotu tenke halo nune’e. Bainhira osan ne’e tama ba Parlamentu husi Governu ha’u iha kedan kopia ida no ha’u lee kedan ona,” Ramos-Horta hateten.
Zefe Estadu ne’e konkorda tebes tanba prsamentu iha OJE 2926 ne’e balun aloka ba iha área infraestrutura ne’e boot liutan, liuliu la’ós de’it estrada maibé halo eskola, kanalizasaun bee-moos, irigasaun sira-ne’e tama hotu ba orsamentu fundu infraestrutura.
Orsamentu biliaun $2,2 iha OJE 2026 ne’e, fahe ba kategoria Saláriu no Vensimentu $476,870,249, Bens no Servisu $447,904,446, Transferensia Públika $820,710,160, Kapital Menor $32,556,96 no Kapital Dezenvolvimentu $436,647,379.
Notísia Relevante: PN aprova proposta OJE 2026 iha finál globál
Jornalista : Hortencio Sanchez
Editór : Cancio Ximenes
