Ramos-Horta kondena golpe Estadu iha Giné-Bissau

DILI, 27 Novembru 2025 (TATOLI)—Prezidente Repúblika, José Ramos-Horta, mantein nafatin ninia kompromisu metin ba prinsípiu dame nian, Estadu Direitu no orden konstitusionál hodi kondena golpe Estadu ne’ebé akontese iha Repúblika Giné-Bissau foin lalais ne’e.

“Ha’u apela, iha momentu ida-ne’e, ba líder no instituisaun hotu-hotu Giné-Bissau nian atu tau interese nasionál aas liu buat hotu, atu rejeita kualkér forma violénsia nian no atu defende orden konstitusionál ne’ebé salvaguarda vontade povu nian. Prosesu eleitorál tenke hetan protesaun. Ha’u husu ba parte hotu-hotu atu hein rezultadu ofisiál eleisaun nian no atu serbisu hamutuk ba pás no estabilidade,” Ramos-Horta hateten liuhusi nota ne’ebé TATOLI asesu, ohin.

Timor-Leste no Guiné-Bissau hametin lasu istóriku no amizade ne’ebé kle’ur ona, ne’ebé reforsa liuhusi Timor-Leste nia pertense komún iha Komunidade País sira ho Lian Portugés (CPLP) no iha g7+.

Enkuantu nasaun ne’ebé mós la’o ona iha dalan ida ba pás, estabilidade no konsolidasaun demokrátika, Timor-Leste fiar tebes iha importánsia atu rezolve tensaun polítika liuhusi prosesu konstitusionál no diálogu pasífiku.

Oras ne’e daudaun Giné-Bissau kaer Prezidénsia rotativa hosi CPLP, knaar ida-ne’ebé implika responsabilidade hodi promove valór fundamentál sira organizasaun nian kona-ba kooperasaun, solidariedade no diálogu konstrutivu entre nasaun luzófona sira.

Prezidente Ramos-Horta espresa konfiansa katak instituisaun no líder sira nasaun nian sei atua hodi nune’e reforsa estabilidade no unidade iha komunidade CPLP nia laran.

Timor-Leste hamriik metin iha ninia nasaun maun-alin CPLP nia sorin no parseiru sira hotu ne’ebé komprometidu ba pás no estabilidade iha Guiné-Bissau.

“Ami prontu atu apoia, hamutuk ho CPLP no ho komunidade internasionál ne’ebé luan liu, esforsu diplomátiku ruma ne’ebé destinadu atu restaura kalma, proteje orden konstitusionál no asegura moris-di’ak povu guiniense nian,” nia konklui.

TATOLI