KOVALIMA, 27 Novembru 2025 (TATOLI)- Sentru Komunidade Kovalima (CCC), durante-ne’e, observa katak feto nafatin la hetan no hasoru diskriminasaun iha nivél foti desizaun politika.
“ Ami foti maka lideransa, realidade ita-haree katak feto nafatin hetan diskriminasaun no la hetan oportunidade liuliu iha parte nivél desizaun polítika, tanba ne’e maka ami hala’o atividade liuhusi hatudu teatru oinsá bele desmostra ba iha públiku hodi hatete la’e ba diskrimiasaun hasoru feto sira”, Jerente Programa Dezenvolvimentu Feto Rurál CCC, Hilaria Amaral do Carmo, hato’o ba jornalista sira, iha Aldeia Sanfuk ,suku Camnasa, ohin.
Teatru ne’ebé maka feto sira hatudu kona-ba igualdade jenéru, asediu sesuál no violénsia doméstika sempre akontese, tanba ema la fahe knaar ba malu entre feen no laen iha família nune’e feto no labarik maka sai vitima ba iha prosesu tomak.
“Ita haree violénsia doméstika sempre akontese tanba ema la fahe kna’ar ba malu entre feen ho la’en no ladun hatene sira-nia servisu ne’ebé maka sira halo iha sira-nia família rasik hanesan hala’o servisu iha uma laran. Liuhosi aprezentasaun teatru bele fó hanoin ba públiku hodi bele refleta sira-nia hahalok ne’ebé sira hala’o”, nia fó hanoin.
Teatru ne’ebé maka feto sira aprezenta hodi komemora kampaña loron 16 ativizmu hakotu violénsia dijital hasoru feto no labarik feto hotu ho tema “Hamutuk hasa’e konsiénsia literasia no online seguru ba feto no labarik feto iha diversidade hotu”.
“ Ita haree realidade iha mudansa ho dijital online fó impaktu liuhusi asesu mídia online hodi haluha servisu no uza telefone sai atan ba ita. Ita la hatene uza telefone uza sala mídia online fó impaktu negativu. Ita komesa envolve labarik sira oinsá atu promove violénsia sira ba públiku”, nia dehan.
Reprezentante Autoridade Munisípiu Kovalima, Fernando Noronha, hanesan Xefe Suku Camnasa, dehan komemorasaun loron ida-ne’e importante oinsá atu fó hanoin ba komunidade hodi halo reflesaun ba sira-nia hahalok.
“Ita haree labarik sira uza telefone fó impaktu hodi hamosu problema iha suku laran tanba ho idade ki’ik bele forma família sedu. Ha’u fó hanoin tenke muda ita-nia halalok ne’ebé maka durante ne’e ita halo”, nia informa.
Jornalista:Celestina Teles
Editór:Florencio Miranda Ximenes
