DILI, 27 Novembru 2025 (TATOLI)–Sekretariu Jerál Partidu Frente Revolusionária Timor-Leste Independénsia (FRETILIN) Marí Alkatiri hateten, kompleta ona tinan 50 proklamasaun independensia, nu’udar jornada foun ba hasai povu husi mukit.
“Tinan 50 ida-ne’e ba ita atu hahú jornada foun ba luta hodi krore povu husi mukit, la’ós atu ita ba festa kontente hamutuk hodi haluha tiha jornada atu mai ne’e,” Alkatiri hateten liuhusi konferénsia imprensa ne’ebé hala’o iha Gabinete Eis-Titulár, Faról, ohin.
Nia dehan, iha jornada foun ne’e tenke luta nafatin, tenke brani nafati, maibé luta ho polítika ida atu sebí povu ho programa ne’ebé klaru atu hasai duni povu husi mukit.
“Ida-ne’e mak ita-nia luta hahú aban, ba povu hotu, aban ida-idak iha nia-uma halo reflesaun. Tenke kontente nafatin tanba ita konsege ona, tanba atu tama ba tinan 50 proklamasaun, ita tama ona ba ASEAN, ita tenke kontente. Maibé, ita seidauk hatene, ita atu ba halo saida iha ASEAN. Povu nia produtu seidauk iha folin atu kompete iha ASEAN, maibé ita tama ona, oinsá mak ita atu hasoru dezafiu iha ASEAN,” nia dehan.
Tuir Alkatiri, atu hasoru dezafiu iha ASEAN, Governu ida tenke hatene polítika ida oinsá atu serbí povu, saida mak planu oinsá atu haburas polítika ekonomia atu Timor-Leste sai membru ASEAN ida metin no sai parseria ba nasaun membru sira seluk.
“Ita tenke iha Governu ida hatene halo jestaun ba ekonomia, oinsá dezenvolve ekonomia rai-laran hodi sai membru ASEAN ida metin, la’ós ita ba tane liman ba nasaun membru sira seluk. Ita ba ASEAN la’ós atu husu izmola, maibé parseria ho direitu hanesan, bainhira direitu atu hanesan, ita-nia kapasidade mós tenke iha nivél mais ou menus hanesan,” nia hateten.
Jornalista : Hortencio Sanchez
Editór : Cancio Ximenes
