“Tranzisaun jerasionál la’ós ha’u ho Xanana mak hatudu”

DILI, 27 Novembru 2025 (TATOLI)–Sekretáriu Jerál Partidu Frente Revolusionaria Timor-Leste Independensia (FRETILIN). Marí Alkatiri, hateten Timor-Leste nasaun demokrátiku atu halo tranzisaun jerasionál maibé la’ós nia ho Xanana Gusmão mak atu hatudu.
“Tranzisaun jerasionál la’ós Xanana mak tenke hatudu jerasaun ida, Marí mak atu hatudu jerasaun ida atu ba ukun, jerasaun sira-ne’e mak tenke hahhoris sira-nia lideransa,” Alkatiri hateten liuhusi konferénsia imprensa ne’ebé hala’o iha Gabinete Eis-Titulár, Faról, ohin.
Nia dehan, hanesan jerasaun tuan kontinua loke dalan ba jerasaun foun sira maibé jerasaun foun tenke hahú ona hamoris no hadia sira nia kapasidade lideransa atu kuidadu nasaun ne’e.
“Ami sei la taka dalan, ami kontinua hamosu polítika ida dehan tranzisaun jerasionál. Se ami lakohi halo ida-ne’e, ema ne’ebé mai servisu ho ami atu sai de’it kriadu, ne’e labele,” Alkatiri afirma.
Nia hatutan, nu’udar jerasaun tuan sei la haruka ema ida atu ‘bomba-rai’ no halo buat oioin hodi fó pozisaun no lakon dignidade.
“Iha FRETILIN loke dalan ba joven barak atu hakat ba oin no iha lideransa di’ak atu lori nasaun ne’e ba oin, maibé ha’u kontra kuandu ita atu hatudu fali sé mak atu troka ita,” nia hateten.
Maibé líder jerasaun tuan ne’e husu ba jerasaun foun sira-ne’ebé prepara-an atu kaer rai ne’e iha future, tenke brani hodi ko’alia buat loos no buat la-loos.
Jornalista : Hortencio Sanchez
Editór : Cancio Ximenes

