Governu-Sekretariadu Expo Xina-ASEAN organiza Roadshow Globál CAEXPO ba da-23
DILI, 28 Novembru 2025 (TATOLI)—Governu liuhusi Ministériu Komérsiu no Indústria hamutuk ho Sekretariadu Expo Xina‐ASEAN, organiza Roadshow Globál CAEXPO ba da-23 (Estasaun Timor‑Leste), ho objetivu atu partilla informasaun hotu kona-ba CAEXPO ba Timor-Leste nu’udar membru foun ba ASEAN.
Roadshow Globál ne’e, dezeña atu promove Expo Xina-ASEAN iha nivel internasionál, atrai empreza no investidór sira no hatudu oportunidade sira ba kooperasaun iha komérsiu, investimentu, no inovasaun.
Diretór Jerál Ministériu Komérsiu Indústria, Martins Magno, hateten ohin loron ne’e hatudu forsa relasaun entre Xina ho ASEAN, parséria ne’ebé sai ida entre kooperasaun rejional ne’ebé dinámiku liu iha mundu, nune’e espozisaun nia papel sai sentrál iha relasaun ida-ne’e hahú husi tinan 2004.
Espozisaun sai ona plataforma ekonómika boot liu no influente iha Ázia hodi promove komérsiu, investimentu, dezenvolviment industriál, no konektividade entre Xina ho nasaun membru ASEAN hotu.
“Ba Timor-Leste, Espozisaun ne’e signifikadu espesiál nu’udar membru foun iha ASEAN, no partisipasaun iha CAEXPO ajuda esklarese ita-nia integrasaun ba ekonómia rejionál,” Diretór Jerál informa ba jornalista sira iha Hotel Palm Spring, Kampung Alor, kinta ne’e.
MCI konsidera Xina nuudar parséria konfiavel Timor-Leste nian, entaun ita-nia kooperasaun sai ona parséria estratéjika komprensiva iha tinan 2023, refleta konfiansa no kompromisu ba dezenvolvimentu liuhusi projetu infrastrutura, harii kapasidade no fasilita komérsiu, Xina ajuda hari baze importante ba ita nia transformasaun ekonómika.
“Atividade espozisaun ne’e loke dalan ba nasaun Timor-Leste atu asesu merkadu foun, atrai investimentu, promove produtu no troka koñesimentu ho parséria rejionál sira,” nia dehan.
Tanba ne’e, ohin loron, involve setór privado sira hodi sosializa informasaun kona-ba CAEXPO hodi tinan oin 2026 bele partisipa iha espozisaun Xina-ASEAN ne’ebé sei hala’o iha Nanning, Xina
“Tinan oin, ita sei partisipa no daudaun ne’e, ita iha ona produtu balun ne’ebé atu lori mak hanesan kafé, mina-nuu no seluk tan, nune’e nia husu ba setór privado sira, atu kontinua esforsu sira-nia produtu ho kualidade,” nia dehan.
Responsavel asuntu ASEAN no WTO iha CCITL, Sidonio Freitas, hateten ida-ne’e hanesan enkontru dahuluk hodi konvida setór privadu sira hanesan empreza mikro pekeña ho Governu atu organiza malu para partisipa iha espozisaum Xinaa-ASEAN 2026.
“Ida-ne’e sinál diak ida hanesan ohin parséria sira dehan katak Timor-Leste tenke hola parte mós tanba daudaun ne’e sai ona membru plenu ba ASEAN liuhusi enkontru rejionál ida-ne’e,” nia hateten.
Tanba ne’e, nia dehan, ohin sira foin maka halo enkontru entaun produtu saida mak Timor-Leste iha tenke identifika hodi lori ba aprezenta iha espozisaun Xina.
Jornalista : Alexandra da Costa
Editór : Cancio Ximenes
