VIKEKE, 28 Novembru 2025 (TATOLI)–Ministru Agrikultura, Peska, Pekuária no Floresta, Marcos da Cruz, Sesta ne’e, distribui ekipamentu agríkola moderna ba Prezidente Autoridade Munisípiu (PAM) Vikeke, Francisco C. S. de Gonzaga Soares hodi reforsa setór agrikultura iha Munisípiu Vikeke.
Iha distribuisaun ekipamentu agríkola ne’e, Ministru Marcos da Cruz hateten Governu liuhusi Ministériu Agrikultura, Peska, Pekuária no Floresta (MAPPF) esforsu hodi moderniza setór agrikultura liuhusi ekipamentu modernu ba agrikultór sira hanesan tratór boot, tratór ki’ik, mákina kuda hare, mákina ko’a hare no sama hare no mós apoia ró ba peskadór sira hodi uza ba kaer ikan iha tasi.
“Ita oferese ba PAM Vikeke hodi jere ekipamentu sira-ne’e hodi distribui tutan ba ita-nia agrikultór sira,” Marcos hateten ba jornalista sira iha resintu Autoridade Munisipál Vikeke.
Governante ne’e esplika katak apoiu ne’e nu’udár maneira ida atu hasa’e produsaun rai-laran.
“Autor ba dezenvolvimentu setór agrikultura mak ita-nia agrikultór sira, tanba sira mak bele kuidadu hare to’o iha pós kolleta. Ho ida-ne’e ha’u husu ba agrikultór sira atu badinas no ativu iha toos, natar, haki’ak ikan, haki’ak animál no kaer ikan iha tasi,” nia hato’o.
Iha fatin hanesan, Prezidente Autoridade Munisípiu (PAM) Vikeke, Francisco C. S. de Gonzaga Soares, agradese ba Ministru Agrikultura, Peska, Pekuária no Floresta ne’ebé apoia ona ekipamentu agríkola ba Munisípiu Vikeke hodi tulun agrikultór sira.
“Vikeke iha poténsia ba setór agrikultura ita iha tasi, rai-maran. Liuhusi setór ida-ne’e Vikeke bele fó han ba aan rasik. Nune’e, autoridade munisípiu sei esforsu hodi hasa’e potensialidade sira no lori produtu lokál ba merkadu,” nia dehan.
Ekipamentu agríkola ne’ebé MAPPF distribui ba Autoridade Munisípiu Vikeke kompostu husi ró peska unidade sanulu (10), tratór boot unidade tolu (3), mákina ko’a hare no sama hare unidade lima (5) no mákina kuda hare unidade sanulu (10).
Iha distribuisaun ekipamentu agríkola ne’e Ministru, Marcos da Cruz akompañadu husi Sekretáriu Estadu Peska no Sekretáriu Estadu Floresta, autoridade lokál, komandante PNTL Munisípiu Vikeke no veteranu.
Jornalista: Vitorino Lopes da Costa
Editór: Xisto Freitas da Piedade
