KOVALIMA, 28 Novembru 2025 (TATOLI)- Ministru Komérsiu Indústria (MCI), Filipos Nino Perreira, sai inspetór serimónia iha serimónia komemorasaun aniversáriu proklamasaun Independénsia unilaterál ba dala-50 hamutuk ho Autoridade sira iha munisípiu Kovalima no husu atu hametin unidade nasionál.
“Orgullu tebes ita selebra ita-nia aniversáriu proklamasaun Independénsia unilaterál ba dala-50 hanesan sidadaun sente onra iha nasaun demokrátiku hakarak matein unidade nasionál sai hanesan dalan úniku hametin ita-nia dezenvolvimentu nasional”, Governante ne’e hato’o ba TATOLI , hafoin serimónia isár bandeira iha kampu Ladi, ohin.
Serimónia komemorasaun 28 Novembru hanesan loron importante ba timor-oan hodi halo reflesaun ba jornada pasadu nakonu ho sofrementu tanba família barak lakon balun iha-nia rate balun laiha.
Ho sofrementu ne’e, Governante ne’e husu iha komemorasaun proklamasaun Independénsia ba dala-50 , TL integra nia ekonómia ba iha organizasaun komérsiu hodi integra mós ba membru ASEAN hatudu kompromisiu boot hakarak dezenvolve nasaun iha setór ekonómia.
“ Ita integra ita-nia ekónomia ba iha organizasaun komérsiu no integra ba iha ASEAN hatudu ita kompromisiu boot ida hakarak dezenvolve nasaun liuiu parte ekonomia nian”, nia dehan.
Ho nune’e Timor presiza rekursu umanu, tanba oportunidade nakloke ba ema hotu tanba TL nia populasaun pursentu 74 ho idade produtivu, nune’e joven barak iha kapasidade no iha oportunidade buka atu aproveita no aprende ba dalan ne’ebé pozitivu.
Biban ne’e, Ministru ne’e konsidera atividade kompetisaun sa’e bua ne’e importante atu anima komunidade sira hodi komemora aniversáriu proklamasaun Independénsia unilaterál ba dala-50,iha munisípiu ne’e.
Governante ne’e apresia mós serimónia komemorasaun aniversáriu proklamasaun Independénsia unilaterál iha Kovalima ne’e, partisipa másimu husi parte hotu, joven, universitáriu , alunu ensinu sekundáriu no komunidade sira iha kampu Ladi.
Iha biban hanesan, Prezidente Autoridade Munisípiu Kovalima, Miguel Armada Cardoso, reforsa komemora loron proklamasaun indepénsia loron ne’ebé importante ba timor-oan hodi hametin unidade nasionál.
“Ohin loron bolu dehan festa osan mean tinan 50 proklamasaun Independénsia Unilaterá ho komunidede hotu atu hanoin hikas loron nasionál referidu ema hotu iha sentidu rasik no hanetin unidade nasionál atu dezenvolve Timor-Leste,” nia afirma.
Serimónia komemorasaun ne’ebé hala’o iha kampu ladi ne’e, partisipa komunidade husi Suku sira hanesan, Suku Debos, Suai Loro, Camnasa,Labarai no suku Beco ne’ebé maka pertense ba postu administrativu Suai no postu sira seluk hala’o iha ida-idak nia postu rasik.
Jornalista:Celestina Teles
Editór:Florencio Miranda Ximenes
