BOBONARU, 28 Novembru 2025 (TATOLI) – Husi Janeiru to’o 21 Novembru 2025, Polisía Nasionál Timor-Leste (PNTL) munisípiu Bobonaru submete kazu 263 ba Ministériu Públiku (MP), ne’ebé maioria krime kontrabandu ba atividade tranzasaun merkadoria ilegál iha fronteira.
Asuntu ne’e fó sai husi Komandante Polísia munisípiu Bobonaru, Superintendente Xefe Agustinho Gomes da Silva, bainhira aprezenta relatóriu ba Ministru Justisa, Sérgio Hornai, iha marjen halo reflesaun ba komemorasaun Loron Proklamasaun Independénsia 28 Novembru ba da-50.
Notísia relevante: UPF detein sidadaun Indonézia na’in-ida hakat ilegál fronteira
“Até 21 Novembru, PNTL Bobonaru refere kazu krime ba Ministériu Públiku hamutuk 263 no entre kazu sira ne’e dominante kontrabandu, segundu ofensa integridade fízika simples, terseiru kazu maus tratus konjuje ho violénsia doméstika no seluk tan. Entre kazu sira ne’e iha omisídu tolu”, nia informa iha salaun Maria Tapó.
Aleinde ne’e, PNTL Bobonaru mós haruka fila sidadaun indonézia balun ba nia rai orijen, tanba tama territóriu Timor-leste ho ilegalmente no balu ho kondisaun defisiénsia mentál.
Prezidente Autoridade munisípiu Bobonaru, Paulo Moniz Maia, komenta katak kazu krime kontrabandu kontinua akontese, tanba fronteira rai-maran entre Timor-Leste no Indonézia luan, nune’e susar ba autoridade seguransa no defeza atu kombate.
Antigu deputadu ne’e argumenta katak sidadaun sira kontinua halo atividade ilegál, tanba nesesida maski sira hatene katak aktu ne’e iha risku nia-laran.
“Sira tama husi tasi mós Polísia kaer. Sira nafatin halo ne’e signifika sira manán barak, ekomikamente munisípiu sira iha fronteira ne’e iha parte ida di’ak, maibé lei bandu katak labele halo atividade ilegál”, katak.
Ba kestaun ne’e, Ministru Justisa, Sérgio Hornai, subliña katak Governu prepara hela planu estratéjiku oioin hodi hametin vijilánsia iha área fronteira sira, iha esforsu atu prevene entrada prátika ilegál sira no krime tranznasionál sira iha territóriu Timor-Leste.
Ministru haktuir katak asuntu krime tranznasionál, inklui tráfiku droga no atividade ilegál sira seluk presiza atensaun séria no kooperasaun sólida entre parte relevante sira.
“Ami sei implementa planu espesífiku oioin iha zona fronteira nian hodi aborda gradualmente no halakon prátika sira ne’ebé lori ba atividade ilegál sira. Timor-Leste sei la permite atu krime sira hanesan ne’e tama iha fronteira sira”, nia subliña.
Nia fó ezemplu katak nasaun sira seluk, inklui Estadu Unidu Amérika no Méksiku halo barreira iha fronteira, maibé Timor-Leste seidauk hanoin to’o iha ne’ebá no importante liu mak Ofisiál Polísia Suku (OPS), Polísia Komunitária no órgaun sira tau-matan ba asuntu fronteira.
Tuir dadus 2024, PNTL Bobonaru submete kazu 315 ba MP, husi totál ne’e 96 mak krime kontrabandu.
Notísia relevante: Lere: “Kualkér Sidadaun, Labele Tama-Sai Fronteira Ilegál”
Jornalista: Sergio da Cruz
Editora: Maria Auxiliadora
