Prezidente Parlamentu: “Progresu ba oin depende ita hotu hamutuk”
DILI, 28 Novembru 2025 (TATOLI)-Prezidente Parlamentu Nasionál, Maria Fernanda Lay, iha ámbitu komemorasaun Loron Proklamasaun Independénsia Unilaterál, 28 Novembru 1975-28 Novembru 2025 ba da-50, apela ba parte hotu atu hamutuk hodi lori dezenvolvimentu país ba moris di’ak povu nian.
Líder másima órgaun soberania daruak ne’e presta omenajen ba guerilleiru, ema sivíl no vítima ne’ebé mate durante luta iha ai-laran.
“Sira ne’ebé balun hetan sira-nia naran iha. Sira ne’ebé naran laiha, ita ho orasaun hamutuk ho sira. Parabéns ba povu Timor-Leste. Progresu ba oin, depende ita hotu hamutuk, politikamente ita tenke hamutuk rekonsilia ba malu para lori dezenvolvimentu ba povu”, nia hato’o hafoin partisipa iha serimónia komemorasaun data istórika ne’e iha Palásiu Governu, ohin.
Hodi apela mós ba foinsa’e sira hanesan futuru nasaun atu nafatin kontribui ba pás.
“Joven sira, ha’u-nia lia-menon, labele ema uza ba interese ema seluk nian, estudante sira ne’ebé futuru líder país. Páa para bele iha dezenvolvimentu iha Timór”, dehan.
Hodi salienta, tinan oin progresu barak sei lori mai, maibé buat hotu depende ba estabilidade polítika iha rejiaun no mós polítika iha rai-laran.
Prezidente Parlamentu hein katak líder nasionál sira atu tuur hamutuk.
“Ohin, Prezidente Repúblika mós husu para iha rekonsiliasaun, tanba horisehik iha Parlamentu mós [realiza sesaun solene]. Ha’u komprende ita iha atividade barak, maibé líder sira bele tuur hamutuk. Ha’u labele hateten tenke. Sira líder nasaun nian, sira mak hatene di’ak liu saida ba rai no povu”, nia salienta.
Jornalista: Nelson de Sousa
Editora: Maria Auxiliadora
