Riak Leman konsidera ezisténsia proklamasaun independénsia inísia husi funu
DILI, 28 Novembru 2025 (TATOLI)—Prezidente Konsellu Kombatente Libertasaun Nasionál (CCLN, sigla portugés), Vidal de Jesus “Riak Leman”, konsidera ezisténsia loron proklamasaun independénsia 28 Novembru 1975 inísia husi funu.
Nia hateten, ohin loron importante tebes tanba mai husi funu naruk durante tinan 24 hodi halo proklamasaun unilaterál tinan 1975, nune’e bainhira invazaun Indonézia ne’e tenke halo funu ho inimigu sira hodi asegura Timor-Leste nia ukun rasik-an.
“Ohin loron, ita selebra tinan ba da-50, hafoin funu hotu iha mudansa lubuk ida hahú husi Governu dahuluk to’o Governu da-sia, liuliu dezenvolvimentu insfraestrutura, ekonómia no kooperasaun bilateral, tamba iha la’ós marka pasu de’it iha fatin,” Prezidente Konsellu Kombatente Libertasaun Nasionál ne’e hateten ba Agência Tatoli, hafoin partisipa komemorasaun loron proklamasaun independénsia ba da-50, iha Palásiu Governu, ohin.
Tanba ida-ne’e mak nia afirma, povu hotu-nia hakarak atu dezenvolvimentu tenke la’o, maibé situasaun tenke hakmatek no iha estabilidade.
Tnba ne’e, nia husu ba joven sira atu prepara ida-idak nia-an hodi kontribui ba dezenvolvimentu nasaun nian, presiza respeita malu hahú husi família to’o iha sosiedade sira seluk no banati tuir saida mak líder rezisténsia sira halo iha pasadu to’o ohin loron.
“Joven sira-nia unidade tenke metinm koopera ho Estadu liuliu parte seguransa no autoridade lokál sira atu estabelese situasaun hakmatek ba nasaun ida-ne’e,” nia dehan.
Jornalista : Alexandra da Costa
Editór : Cancio Ximenes
