DILI, 28 Novembru 2025 (TATOLI)–Sekretariu Jerál Partidu Frente Revolusionaria Timor-Leste Independensia (FRETILIN) Marí Alkatiri hateten, atu buka solusaun hodi rezolve problema rai-laran la signifika hasoru malu ho Xanana Gusmão.
“Ha’u nia hanoin solusaun ne’e la’ós ami na’in-rua (2) atu hasoru malu. Hasoru malu bele se fasilita, maibé laiha kondisaun laiha problema. Maibé solusaun ne’e mai husi votu povu nian, povu mak tenke vota. Lalika hanoin katak ami na’in-rua (2) hakuak malu ona mak buat hotu bele sai ba di’ak,” Alkatiri hateten liuhusi konferensia imprensa ne’ebé hala’o iha Gabinete Eis-Titulár, Faról, kinta (27/11/2025) ne’e.
Nia dehan, entre nia ho Xanana di’ak malu no la hirus malu, maibé tanba la manán eleisaun mak akontese nune’e, maibé laiha problema.
“Buat ne’e tanba ida manán eleisaun, ida lakon eleisaun, ita hirus-malu to’o agora. Ha’u la hirus ema ida bainhira nia manán eleisaun, ha’u komesa hirus bainhira nia ukun la-loos. Manán eleisaun normál, ida-ne’e demokrasia, ukun halo diskriminasaun hasoru povu, hasoru partidu seluk ne’e mak ha’u hirus. Manán justu ka la justu ne’e, ida-idak nia prova. Ba ha’u, FRETILIN nunka lakon eleisaun, osan mak manán eleisaun,” nia dehan.
Nia hatutan, bainhira atu hasoru malu entre nia ho Xanana hodi buka solusaun ba problema rai-laran, Xanana mak tenke nakloke.
“Sé mak ukun, sé mak iha podér nia mak tenke loke dalan, se lae, hanesan ha’u ba husu izmola., Ha’u la ba husu izmola, ha’u-nia inisiativa mak halo krítika ne’e. Ha’u krítika la’ós atu hatun maibé krítika atu ajuda, loke hotu-hotu nia neon no matan. Ha’u la halo golpe, ha’u nunka halo golpe,” nia dehan.
Jornalista : Hortencio Sanchez
Editór : Cancio Ximenes
