DILI, 29 Novembru 2025 (TATOLI) — Kapela São João Batista Casnafar ofisialmente inaugura no simu bensa husi Arsebispu Metropolitana Dili, Dom Virgílio Cardeal do Carmo da Silva, iha loron Sábadu (29/11), ne’ebé konsidera hanesan momentu istóriku ba komunidade Katólika Casnafar.
Iha intrevista ho TATOLI, Dom Virgílio hato’o parabéns ba komunidade sarani Casnafar ne’ebé hamutuk hodi hadia no hetan kapela ida ne’e.
“Parabens ba komunidade sarani Casnafar ne’ebé inaugura sira nia Kapela São João Batista, esforsu ida ne’ebé sarani sira hamutuk ho sira nia meius oin-oin ita konsege inagura kapela diak ida, furak ida ba sira hodi harohan, halibur hamutuk, reza no selebra eukaristia,” hateten Dom Virgílio hafoin selebra misa ba inagurasaun no Krizma iha Kapela Casnafar, Sábadu ne’e.
Nia husu komunidade atu kontinua tau matan ba prezensa Maromak, no hodi kapela ne’e sai hanesan espasu hodi hametin unidade, dame, domin no paz iha komunidade laran.
Dom Virgílio mós agradese estratéjia husi Padre Pároko Parókia São Francisco Xavier, Dare, Pe. Domingos Bian ne’ebé halo koordena ho frater sira OFM (Ordo Fratrum Minorum) iha Dili atu kontínua halo misa kada Domingu no selebra loron bo’ot sira iha Kapela Casnafar.
“Ne’e oportundiade diak atu halo iha misa ne’ebé bebeik iha fatin ida ne’e, nune’e bele haburas liu tan vida espiritual nu’udar sarani nian, bainhira vida espiritual diak sem duvida bele ajuda mos sira nia vida moral, no nu’udar Timoroan bele buka nafatin dame, domin no paz nia lara.,” nia hateten tan.
Misa selebrasaun ba inaugurasaun ne’e dirije direta husi Dom Virgílio inklui fo Krizma ba Krizmandu 111 husi Casnafar.
“Ne’e duni ita haksolok inaugura no harii ita nia kapela tanba iha ne’e iha komunidade no sarani. Ohin ita laos deit inaugura maibe mos iha ne’e simu espiritu santu, sakramentu krizma no ita harohan atu Nai Maromak hakonu sira ho espiritu Maromak nian,” esplika Dom Vrigílio.
Iha fatin hanesan Prezidente Komisaun Organizadora, Januario Marques, hateten ba TATOLI katak Kapela São João Batista Casnafar nia prosesu konstrusaun la’o naruk ho dezafiu barak.
“Ohin mak ita marka istória. Kapela ne’e hahu ho peletakan batu pertama iha loron 26 de Juñu 2024. Depois, iha 11 Agustu 2024, ami sobu kapela tuan no hahu konstrusaun. Dezafiu barak ami hasoru, maibé prezensa Amo Paróku no Amo OFM sira mak fo ami korajem hodi kontinua,” nia hateten.
Prosesu ba hari’o Kapela Casnafar rasik hetan apoiu orsamentu total $21.101 husi komunidade lokal inkui Doadores sira. Alende apoiu material iha mós apoiu material konstrusaun.
“Iha barak mak apoiu hanesan naran temi ona, Nune’e mos ba Estatua São João Batista hetan apoiu husi Ary Bargon,” dehan Nia.
Jornalista : Cidalia Fátima
Editora : Armandina Moniz
