DILI, 01 Dezembru 2025 (TATOLI)—Institutu Jestaun Ekipamentu no Apoiu Dezenvolvimentu Infraestrutura (IGEADI, sigla portugés) hamutuk ho parseria nasionál Lisencing.tl, halo abertura hodi fasilita formasaun teória no prátika kona-ba jestaun mákina pezadu ba formandu na’in-80, ne’ebé kompostu husi membru F-FDTL na’in-20 no funsionáriu IJE na’in-60.
Prezidente Institutu Jestaun Ekipamentu no Apoiu Dezenvolvimentu Infraestrutura (IGEADI, sigla portugés), Ana Paula da Cruz, hateten Governu liuhusi Institutu Jestaun Ekipamentu agora daudaun hanoin atu prepara juventude Timor-Leste liuhusi formasaun ida.
“Tanba ne’e mak ohin loron ita asina akordu ho parseria Lisencing.tl, halo abertura hodi jere formasaun ida-ne’e no Governu halo de’it monitorizasaun tanba ita hatene katak ekipamentu pezadu ne’e iha de’it IGEADI. Ami sei buka tan parseria ida hodi fasilita formasaun mekániku nian tanba parseria ida agora fasilita formasaun no sertifikasaun,” Prezidente IGEADI informa ba jornalista sira iha Hotel Novu Turizmu, Lesidere, ohin.
Nia hatutan, maske durante ne’e Sekretáriu Estadu Formasaun Profisionál no Empregu (SEFOPE) mak fasilita formasaun ba formandu sira sein prátika, nune’e IGEADI iha hanoin ida atu loke formasaun gratuita ho pakote teória no prátika atu hetan sertifikadu no lisensiamentu nivel internasionál hodi fasilita sira hetan servisu ho ajénsia internasionál sira iha rai-laran no rai-li’ur.
“Formasaun ne’e sei hala’o durante fulan neen husi formadór Austrália nian ba pilotu dahuluk, enkuantu pilotu daruak sei loke oportunidade ba joven sira hodi envolve, tanba ita asina akordu ho parseria ne’e durante tinan tolu. Atividade teória koñesementu mákina sei hala’o iha IGEADI nia fatin Bidau Santa Ana tasi-ibun no prátika ne’e formadu sira sei destaka ba kada brigada iha territóriu ne’ebé iha hodi kontinua formasaun prátika nian,” nia esplika.
Enkuantu, nia hatutan, daudaun ne’e formasaun sei loke ho gratuita maibé planu ba pilotu daruak atu selu nune’e bele hatama reseita ba Kofre Estadu.
“Kritéria ba formandu sira presiza iha imunidade ne’ebé forte no badinas atu aprende, tanba sira la’ós aprende de’it lori mákina ida maibé sei lori mákina pezadu oin lima ne’ebé daudaun ne’e ita iha,” nia informa.
Xefe suku Bidau Santa Ana, Alexandrino M. Braz, hateten IGEADI sei implementa ninia atividade formasaun jestaun mákina iha Bidau Santa Ana.
“Formasaun ne’e sei fó biban ba ekipa IGEADI no mós membru F-FDTL, hafoin ne’e mak sei loke tan oportunidade ba joven sira hodi envolve,” nia dehan.
Tanba ne’e, nia dehan, hanesan autoridade lokál iha Bidau Santa Ana koopera ho Governu atu kontrola ba fatin ida-ne’e no sei halibur joven sira-ne’ebé iha inisiativa partisipa iha formasaun ne’e, atu iha futuru bele ajuda sira kria empregu ba sira-nia an liuliu bainhira empreza iha Austrália presiza traballadór ne’ebé bele lori mákina.
Atividade ne’e hetan partisipasaun husi entidade Governu, entidade orgaun lejislativu, parséria dezenvolvimentu, autoridade lokál nomós parte igreja nian.
Jornalista : Alexandra da Costa
Editór : Cancio Ximenes
