Negosiasaun fronteira terrestre TL-Indonézia iha Batugade-Salele finaliza ona
DILI, 01 Dezembru 2025 (TATOLI)–Embaixadór Timor-Leste ba Indonézia, Roberto Soares, hateten negosiasaun fronteira terrestre entre Timor-Leste no Indonézia iha Batugade-Bobonaru to’o Salele-Kovalima laiha disputa no finaliza ona diskusaun entre nasaun rua.
“Ho Indonézia ita halo negósiasaun lubuk ida ona, fronteira terrestre ne’ebé prinsipál tebes husi Batugade ba to’o Salele ne’e finalizadu iha nivel tékniku, nivel polítiku no nivel legál,” Roberto hateten ba liuhusi programa entrevista eskluziva ne’ebé halo iha estúdiu TATOLI iha Faról, segunda ne’e.
Nia dehan, daudaun ne’e iha ona akordu provizóriu ida-ne’ebé asina ona iha tinan 2005, maibé segmentu balun iha fronteira prinsipál ne’e balun seidauk iha intendimentu iha Tapo, Memo, maibé to’o tinan 2013 Estadu nasaun rua (2) konsege rezolve no laiha ona disputa.
“Entaun, agora iha fali servisu tékniku sira-nian, ba tau markasaun iha liña fronteira sira bainhira kada tinan iha tempu udan mota sobu tiha markasaun hirak ne’e. Tékniku sira nafatin kontrola hodi halo manutensaun, ida-ne’e servisu kordenada entre nasaun rua (2) ne’e no tékniku nasaun rua (2) nian,” nia dehan.
Entretantu, fronteira Timor-Leste ho Indonézia iha fronteira rua (2) iha rai no tasi, fronteira terrestre ho kilómetru 268,8 hale’u Nusa Tenggara Leste, ne’ebé abranje rejénsia Kupang, Timór Sentrál Norte, Belu no Malaka, fronteira marítima iha Tasi Timor no parte balun sei iha hela negosiasaun nia laran.
Fronteira terrestre Naruk kilómetru 268.8 ho nia fatin kobre rejensia Kupang, Timor Sentrál Norte, Belu no Malaka iha Provínsia Nusa Tenggara Leste iha Timor-Leste nian mak Bobonaru no Kovalima ho Oekusi.
Detallu Rejionál sira
Inklui fronteira sira entre Rejénsia Belu no Malaka no rai-boot Timor-Leste, no iha mós fronteira entre Timór Sentrál Norte no Rejénsia Kupang no Reziaun.
Fronteira marítima
Estatutu: Parte fronteira nian seidauk rezolve no sai hanesan tópiku diskusaun nian entre nasaun rua (2) ne’e.
Postu Transfronteirisu Motamasin (PLBN): Lokaliza iha Nusa Tenggara Leste, sai hanesan pontu fronteira terrestre ida entre Indonézia ho Timor-Leste.
Jornalista : Hortencio Sanchez
Editór : Cancio Ximenes
