Prezidente Komisaun F husu Governu kontrola ai-moruk fa’an iha online
DILI, 01 Dezembru 2025 (TATOLI)-Prezidente Komisaun F iha Parlamentu Nasionál ne’ebé trata Asuntu Saúde, Igualdade Jéneru no Inkluzaun Sosiál, Maria Gorumali Barreto, husu ba Governu, liuhusi entidade kompetente atu kontrola ema ne’ebé fa’an aimoruk liuhusi online iha rede sosiál.
Nia observa katak situasaun fa’an aimoruk online komesa tama rai-laran livre, nune’e sidadaun sira sosa hodi konsumu.
Ai-moruk sira ne’e tama liuhusi distribuidór ilegál sira, tanba la rejistu legalmente iha Diresaun Nasionál Farmásia no Medikamentu. Ho ida-ne’e laiha kontrolu no la kontribui reseita ba Estadu.
“Ai-moruk online tama mai kuaze ikus-ikus ne’e ema [konsumu] mate subasubar iha otél iha Dili laran, iha semana ida kuaze iha kazu rua akontese mate de repente”, nia levanta liuhusi reuniaun plenária Parlamentu, ohin.
Tanba tuir espesialista mikrobiolojistika, ne’e afeta ba ema mate de repente. “Tuir termu médiku sira-nian, ema mate de repente iha rua, ataka korasaun no struck, maibé ita haree iha ema barak la kontrola kondisaun saúde, kada vez sofre tensaun no moras oioin, nia konsumu tan ai-moruk viagra de repente mate”, dehan.
Hodi preokupa katak akontese ema mate iha ótel laran númeru sempre aumenta no situasaun ne’e ameasa ba timoroan sira.
“Ai-moruk ne’e halo presaun raan, de repente hamosu problema iha ritmu fuan no hamenus sirkulasaun raan, tanba afeta ba fuan no ulun, rezulta mate de repente”, katak.
Prezidente Komisaun bolu atensaun sidadaun hotu atu labele sosa ai-moruk ne’ebé fó risku no rekomenda ba Diresaun Nasionál Farmásia no Medikamentu, AIFAESA I.P, Alfándega, Serbisu Imigrasaun atu kontrola ai-moruk ne’e labele tama rai-laran.
Reprezenta Governu liuhusi Vise-Ministru Asuntu Parlamentár, Adérito Hugo, rejista preokupasaun ne’e no sei hato’o ba Ministériu Saúde no entidade tutela sira atu regula di’ak liután produtu referidu.
Jornalista: Nelson de Sousa
Editora: Maria Auxiliadora
