DILI, 03 Dezembru 2025 (TATOLI)—Konsellu Ministru, kuarta ne’e, aprova kontribuisaun finanseira ida ba Unidade Timor-Leste iha Sekretariadu ASEAN ho montante hamutuk rihun $400, no projetu Rezolusaun Governu ida-ne’e aprezenta husi Vise-Ministra ba Asuntu ASEAN, Milena Maria da Costa Rangel, ne’ebé atu hetan autorizasaun kontribuisaun finanseira ida ba unidade Timor-leste iha Sekretariadu ASEAN.
Tuir informasaun ne’ebé Ajénsia Tatoli asesu iha portál Governu katak kontribuisaun ida-ne’e ho objetivu atu fó apoiu ba funsionamentu unidade ne’ebé temi ona no garante kontinuidade atividade esensiál sira hodi akompaña prosesu integrasaun Timor-Leste nian ba ASEAN.
Bainhira Timor-Leste nia adezaun plena nasaun nian ne’ebé formaliza iha loron 26 fulan-Outubru tinan 2025, presiza iha funsionamentu kontinua husi unidade ida-ne’e.
Aleinde ne’e, iha ne’e mós. Konsellu Ministru halo analiza aprezentasaun preliminár husi Primeiru-Ministru, Kay Rala Xanana Gusmão, no Prezidente Komisaun Funsaun Públika (CFP, sigla Portugés) Timor-Leste, Agostinho Letêncio de Deus, kona-ba projetu reorganizasaun estrutura organizasaun administrasaun públika Rejiaun Administrativa Espesiál Oekusi Ambenu nian.
Ikusliu, husi reuniaun Konsellu Ministru delibera hodi fó podér tomak ba Ministra Edukasaun, Dulce de Jesus Soares, ba asinatura akordu kooperasaun iha área edukasaun ho Ajénsia Brazileira Kooperasaun (ABC, sigla portugés).
Jornalista : Alexandra da Costa
Editór : Cancio Ximenes
