DILI, 04 Dezembru 2025 (TATOLI)—Diretór Ezekutivu Asosiasaun Defisiente Timor-Leste (ADTL), Cesário da Silva informa ADTL rejistu ema ho defisiénsia hamutuk 30-resin, ne’ebé sei asesu iha Universidade Nasionál Timor Lorosa’e (UNTL) no Institutu Politékniku Betanu (IPB) iha anu letivu 2026.
“Iha mudasa pozitiva. Iha Ministériu Ensinu Superiór, Siénsia no Kultura hahú iha ona kuota ba ema ho defisiénsia hodi asesu ba UNTL ho IPB. Ida-ne’e oportunidade ida-ne’ebé di’ak, ita hakarak atu promove Ida-ne’e bá-oin. Nune’e, iha tinan ne’e ita-nia maluk defisiénsia ne’ebé rejistu hamutuk 30-resin mak prepara ona,” Cesário da Silva dehan ba jornalista sira, iha Dom Bosco, Komoro, Dili, Kinta ne’e.
Diretór Ezekutivu dehan ida-ne’e seidauk ramata, sei iha prosesu nia laran. Bainhira hotu ona mak foin enkamiña naran ba Ministériu Ensinu Superiór, Siénsia no Kultura.
“Iha semana sira tuirmai ami sei elabora dadus ikus hodi enkamiña ba Ministériu Ensinu Superiór, Siénsia no Kultura, hodi halo prosesamentu,” Cesário dehan.
Nune’e, nia rekomenda ba Ministériu Edukasaun atu envolve ema ho defisiénsia iha ensinu rekorrente iha munisípiu sira atubele hakbiit liután EhD.
Kada tinan fó ba ADTL ne’e ema 30 to’o 60. Ba tinan 2026 daudaun ne’e ADTL rejistu ona kuaze ema 30. Sira-ne’ebé graduasaun ona iha UNTL kuaze 300. Husi sira-ne’e balun servisu ona iha instituisaun públika no privada sira inklui balun loke mesak servisu ba aan rasik no fó servisu ba ema seluk.
Jornalista: Osória Marques
Editór: Xisto Freitas da Piedade
