Empreza Lisun selu koima rihun $10 tanba komete irregularidade
DILI, 04 Dezembru 2025 (TATOLI)—Insperora Jerál Autoridade Inspesaun Fiskalizasaun Atividade Ekonómika Sanitária no Alimentrár (AIFAESA), Odete Viegas, informa empreza Lisun selu koima ho montante rihun $10 hodi kontribui ba kofre Estadu, tanba komete irregularidade foos saku rihun-29 mak estragadu maibé kontinua faan ba konsumidór sira.
“Ita-boot sira hatene fós saku rihun-29 mak estragadu husi kompañia Lisun, maibé prosesu hotu ona no foos hirak ne’e afavór Estadu, empreza mós selu ona koima,” Inspetora Jerál ne’e relata ba jornalista sira iha Hotel JL Word, Metiaut, ohin.
Produtu ne’ebé estragadu ne’e sei la permite ba ema atu konsumu tantu animal tanba foos hirak ne’e sira halo ona teste ba laboratóriu no ninia rezultadu la prienxe ona rekezitu ba ema atu konsumu.
“Entaun alternativa ne’ebé ami uza mak tenke lori foos sira-ne’e ba so’e iha lixeiru Tibar. Foos ne’ebé ekipa AIFAESA destroi ona mak hamutuk rihun-10,” nia hateten.
Maske komunidade balun mak kestiona maneira AIFAESA so’e estraga foos, enkuantu populasaun barak mak nafatin hamlaha, ne’e loos maibé tenke so’e duni produtu estragadu sira-ne’e atu proteje komunidade no populasaun sira labele konsumu hahán ida-ne’ebé mak la saudavel no nutritivu ona.
Aleinde ida ne’e, kona-ba informasaun foos ho marka “Manu Vitoria” no “Ikan Mas” ne’ebé mak públika iha mídia sosiál dehan katak foos ular ne’e ekipa tun kedas hodi halo inspesaun.
“Ami hetan keixa ekipa tun kedas, bainhira fós ne’e estragadu normalmente ami submete notifikasaun ba operadór ekonómiku no konsidera asaun ne’e tama iha prosesu kontra ordenasaun, nune’e tenke prosesa tuir dalan legál,” nia esplika.
Jormalista : Alexandra da Costa
Esitór : Cancio Ximenes
