BOBONARU, 04 Dezembru 2025 (TATOLI) – Populasaun sira hein Governu nia desizaun atu hadi’ak estrada liga husi kapitál Maliana bá postu administrativu Bobonaru, tanba konsidera katak dalan ne’e hanesan úniku asesu atu halo atividade ekonómika.
Abintante Filomena Amaral ne’ebé reprezenta komunidade hato’o nia lamentasaun kona-ba kondisaun estrada, ne’ebé to’o agora seidauk hetan atensaun, maski Governu halo ona levantamentu dadus iha terrenu iha tinan hirak liubá.
Notísia relevante: Komunidade husu ba MOP suspensaun projetu manutensaun estrada Maliana-Bobonaru
“Ami-nia estrada husi Maliana to’o Bobonaru aat. Tinan-tinan mai sukat, iha fulan hirak ba kotuk mós sukat, maibé rezultadu ami seidauk hatene. Tanba ne’e mak ami ezije. Orsamentu tinan 2026 tau prioridade atu hadi’ak ka la’e, ami haree la klaru”, nia dehan ba Tatoli, ohin.
Filomena preokupa tanba estrada aat ne’e fó impaktu maka’as ba komunidade nia atividade ekonómika, liuliu atu transporta produtu lokál bá merkadu no difikulta karreta ambulánsia tula pasiente no inan isin-rua bá Ospitál Referénsia Maliana. Estrada ne’e mós liga bá munisípiu Ermera, Ainaru no Kovalima.
“Feto isin-rua sira dalaruma obrigadu atu tuur iha ahi-matan nia leten hodi hadook-an husi malirin. Durante viajen husi Bobonaru bá Maliana, barak maka susar atu dada iis tanba estrada ne’ebé nakonu ho rai-rahun, labarik barak hetan moras iha dalan klaran, no balun mós mate”, nia afirma.
Iha parte seluk, Alfredo de Jesus nu’udar motórista ida rekoñese katak kondisaun estrada sai susar ba sira atu halo movimentu durante tempu udan.
“Bainhira udan boot, bee nalihun, ami liu araska. Dalaruma ami tenke patina durante oras ida to’o rua mak bele liu. Ami hein katak Governu sei aselera nia prosesu tomak para ami bele liu ho seguru”, nia espera.
Nia salienta katak maski Governu halo beibeik normalizasaun ba estrada, maibé esforsu sira ne’e la dura kle’ur. “Tinan-tinan sira normaliza estrada, maibé udan mai estraga fali. Ami tanis tanba estrada aat fali”, nia lamenta.
Tuir observasaun jornalista Tatoli iha terrenu, fatuk-rahun no rai ne’ebé foin lalais IGEADI aterru hodi normaliza nestrada, iha fatin balu hahu ku’ak, nakfera no tahu filafali hafoin akontese udan bo’ot durante ne’e.
Notísia relevante: MOP halo levantamentu dadus topografia estrada Maliana-Bobonaru
Jornalista: Sergio da Cruz
Editora: Maria Auxiliadora
