DILI, 04 Dezembru 2025 (TATOLI) – Timor-Leste hetan konvite atu partisipa atividade TRAVEX ka ASEAN Tourism Forum (ATF) iha Cebu Filipina, ne’ebé sei hala’o entre loron 28 no 30 Janeiru 2026.
Ditetór-Jerál Ministériu Turizmu no Ambiente (MTA), António da Silva, esplika kona-ba atividade espozisaun ida-ne’e iha tipu rua mak expo ne’ebé organiza eventualmente iha kada tinan lima, hanesan Expo Osaka, no seluk mak expo ne’ebe rejistadu no eskolla mak partisipa.
António da Silva hateten Timor-Leste hakarak hatene kle’an expo ne’ebé mais espesífiku ba turizmu, nune’e bele fasilita setór privadu nasionál hasoru malu ho setór privadu sira husi rai-li’ur ne’ebé bolu Business-to-Business (B2B). Hanesan planu, tinan oin sei iha atividade TRAVEX Fórum Turizmu, ne’ebé sei realiza iha Cebu, Filipina, no sei lori setór privadu sira atu partisipa.
TRAVEX mak reprezenta Travel Exchange, feira anuál turizmu nian ne’ebé hala’o nu’udar parte ida husi Fórum Turizmu ASEAN nian.
Eventu ne’e serve hanesan plataforma negósiu B2B iha ne’ebé vendedór sira husi nasaun ASEAN sira bele hasoru kompradór internasionál sira hodi promove sira-nia produtu no servisu turizmu no harii parseria negósiu foun. TRAVEX maka feira komersiál ida ne’ebé boot liu ne’ebé hatudu produtu no servisu sira husi destinu sira iha rejiaun ASEAN.
Nia esplika funsaun plataforma B2B mak hodi liga vendedór ASEAN ho kompradór internasionál ho objetivu atu esplora produtu no serbisu destinu turístiku oioin iha rejiaun ASEAN, ninia kontestu mak TRAVEX 2026 halo parte iha Fórum Turizmu ASEAN 2026.
Nia subliña kona-ba atividade expo sira ne’e Parlamentu Nasionál (PN) aprova ona Orsamentu Jerál Estadu (OJE) 2026 ba MTA hamutuk millaun $9-resin, husi verba ne’e aloka ba atividade sira hanesan expo, marketing no seluk hamutuk rihun $200-resin.
Nia esplika katak montante rihun $200-resin ne’e ba komponente sira hanesan dijitál marketing, atende expo, mellora website, konvida jornalista sira husi li’ur mai halo kobertura ba Timor-Leste nia sítiu turístika no seluk tan.
Aleinde ne’e, ministériu mós sei haree atividade expo sira seluk ne’ebé bele apoiu setór privadu sira mak hanesan idetifika atividade expo balu ne’ebé haree hanesan Expo Pasific Asia Travel Association (PATA) ne’ebé Timor-Leste mós sai membru, entaun oinsá fasilita atu introdús setór privadu sira, nune’e sira bele iha koneksaun ho setór privadu internasionál.
“Iha expo barak ne’ebé ita bele partisipa hanesan epesífiku marketing nian ba Asia Dive Expo no kruzeiru nian, maibé ita sei haree didi’ak tanba eventu internasionál sira ne’e barak, entaun ita halo selesaun ida-ne’ebé efetivu mak bele partisipa”, dehan.
Daudaun, ministériu sei halo preparasaun hodi lori setór privadu sira ba partisipa iha atividade sira ne’e.
Jornalista: Arminda Fonseca
Editora: Maria Auxiliadora
